Dúısenova Qazaqstandaǵy onkologııalyq qyzmetti jetildirý máselelerin halyqaralyq sarapshylarmen talqylady

ASTANA. QazAqparat - Búgin QR Densaýlyq saqtaý jáne áleýmettik damý mınıstri Tamara Dúısenova Dúnıejúzilik densaýlyq saqtaý uıymy (DDU) jáne Atom energııasy jónindegi halyqaralyq agenttik (MAGATE) ókilderinen turatyn halyqaralyq delegatsııamen kezdesti, olar otandyq onkologııalyq qyzmettiń damýy týraly esepti usyndy, dep habarlaıdy vedomstvonyń baspasóz qyzmetinen.

Sheteldik sarapshylar Astana jáne Almaty qalalaryndaǵy onkologııalyq ortalyqtarǵa, Qazaq onkologııa jáne radıologııa ǵylymı-zertteý ınstıtýtyna, Almaty qalasy №1 emhanasynyń pallıatıvti kómek ortalyǵyna, S. Asfendııarov atyndaǵy Qazaq ulttyq medıtsınalyq ýnıversıtetine, Respýblıkalyq joǵarǵy medıtsınalyq kolledjine bardy.

Sonymen qatar, DDU jáne MAGATE delegatsııasy obyr syrqattanýshylyǵynyń kórsetkishterin zerttep, QR onkologııalyq qyzmetin damytý boıynsha alda turǵan mindettirine jáne jetistikterine, ulttyq basymdylyqtaryna sholý júrgizdi.

T. Dúısenovamen kezdesý barysynda sarapshylar Qazaqstandaǵy onkologııalyq qyzmet josparly damyp jatqanyn atap ótti, sonymen qatar QR-da obyr syrqattanýshylyǵyna skrınıng júrgizýdi kúsheıtý boıynsha usynystar berdi.

Kezdesý sońynda T. Dúısenova sarapshylarǵa júrgizilgen jumystary úshin alǵys bildirdi jáne onkologııalyq syrqattanýshylyqpen kúreste  DDU jáne MAGATE-niń tájirıbesin qoldanýǵa daıyn ekenin jetkizdi.