Dúısenova dári-dármektiń qymbatshylyǵy týraly túsinik berdi
«Tegin bazalyq medıtsınalyq kómek baǵdarlamasy boıynsha dárilerdi Reseıden satyp alamyz. Eger de bul elde qymbattasa, bizde de baǵa kóteriledi. Al dárihanalarda ótkiziletin dári-dármektiń baǵasyn biz retteı almaımyz»,-dedi mınıstr Úkimet otyrysynan keıin tilshiler saýalyna jaýap berý kezinde.
Osy oraıda T. Dúısenova 2015 jyldan bastap Qazaqstan referenttik baǵa qalyptastyrýǵa kóshkenin eske salyp ótti.
«Tegin medıtsınalyq kómek aıasynda biz satyp alatyn dárilik zattar boıynsha barlyq baǵalar tómen, sebebi 2015 jyldan bastap referenttik baǵa qalyptastyrýǵa kóshtik. Osy oraıda Reseıdegi, Belarýstegi, Qazaqstannyń ishindegi, sonymen qatar, Eýropanyń bes elindegi baǵalardy qaraımyz. Sondyqtan da satyp alynatyn dári-dármek boıynsha qandaı baǵa qalyptasyp otyrǵandyǵy týraly naqty aıta alamyz. Ótken jáne onyń aldyndaǵy jyldarda dárilik zattardy 2014 jyldyń baǵasymen aldyq. Qadaǵalaý sharalary júzege asyrylyp jatyr. Biz tegin medıtsınalyq kómektiń kepildendirilgen kólemi aıasynda satyp alynatyn dárilik preparattardyń baǵasyn tolyqtaı rettep otyrmyz. Al qalǵandary tek naryqqa baılanysty, ıaǵnı árbir dıstrıbıýtor ózinshe óndirýshimen shart bekitip, osynda jetkizip, bólshek naryqta satady»,-dep túsindirdi mınıstr.
Onyń sózine qaraǵanda, otandyq farmatsevtıkalyq naryqtyń kólemi 360 mlrd. teńgege jýyqtaǵan.
«Onyń ishinde 160 mlrd. teńgesin memleket satyp alady, oǵan baǵalar belgilengen. Al 280 mlrd. teńge bıznes satyp alatyn úleske tıesili. Ondaǵy taýarlar men qyzmetter rettelmeıdi. Degenmen de biz bul máseleni qarastyryp jatyrmyz, osy rette bıznespen birge tıisti sharalardy qamtýymyz múmkin»,-dedi mınıstr.