Dúısenova aýylda júrgen jumyssyz jastardy jappaı bızneske úıretýdi kózdeıdi
ASTANA. QazAqparat - QR Densaýlyq saqtaý jáne áleýmettik damý mınıstri Tamara Dúısenova aǵymdaǵy jyly jańa baǵdarlamany paıdalanyp, aýylda jumyssyz júrgen jastardy kásipkerlikke baýlýdy kózdep otyr, dep habarlaıdy QazAqparat tilshisi.
Mınıstrdiń sózine qaraǵanda, sońǵy bes jyldyń ishinde jumyspen qamtý baǵdarlamasy aıasynda 380 myńnan astam jasqa memlekettik qoldaý kórsetildi.
«Degenmen de, qazirgi tańda jastar arasynda jiti kóńil bólýdi talap etip otyrǵan 200 myńǵa jýyq azamattar bar. Olardyń 56 paıyzy aýylda turady. 90 myńy - jumyssyzdar, al 103 myń adam - ózin-ózi jumyspen qamtyǵan azamattar. Bulardyń kópshiligi tek orta mektepti támamdaǵan jastar ǵana bolyp otyr. Osy sanattaǵy jastarǵa memlekettik qoldaý retinde bıylǵy jyly júzege asyrylǵaly otyrǵan «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda oqytý, kásipkerlikke baýlý, nesıe berý jáne jastar praktıkasyn keńeıtý máseleleri qarstyrylyp otyr», - dedi T.Dúısenova Úkimettiń búgingi otyrysynda.
Osy oraıda mınıstr aýyl ákimderiniń aqparattyq júıelerin keńinen damytý qajet dep sanaıdy. Onda turǵyndardyń tek sany men turmystyq jaǵdaıy ǵana emes, sonymen qatar memlekettik qoldaýdy qajet etetin azamattar da kórsetiledi.
«Osyndaı aqparattyq júıeni biz Aqmola oblysynyń Arshaly aýdanynda, Aqtóbe qalasy men oǵan qarasty alty kentte ilki joba retinde engizdik. Ony barlyq oblystarda, Astana men Almaty qalalarynda kezeń-kezeńimen engizý kerek dep sanaımyz. Bul júıe eń aldymen barlyq deńgeıdegi ákimder úshin aýyl turǵyndary týraly jan-jaqty ári naqty derekter qoryn qalyptastyrýǵa múmkindik bermek. Ekinshiden, sonyń arqasynda «elektrondy úkimetti» aýyl-aımaqtarǵa keńinen taratýǵa bolady», - dep atap kórsetti Dúısenova hanym.
