Dúısenǵazy Mýsın Katonqaraǵaı ulttyq parkiniń máselesin sheshýge shaqyrdy

NUR-SULTAN. QazAqparat - Senator Dúısenǵazy Mýsın Úkimet basshysy Álıhan Smaıylovtyń atyna joldaǵan depýtattyq saýalynda Katonqaraǵaı memlekettik ulttyq tabıǵı parkine qatysty ózekti máselelerdi jarııa etti, dep habarlaıdy QazAqparat tilshisi.

Depýtattyń aıtýynsha, Katonqaraǵaı ulttyq parkiniń materıaldyq-tehnıkalyq bazasy álsiz jáne kadrǵa zárýlik bar. Normatıvke sáıkes park aýmaǵynda 732 adam jumys isteýi tıis, alaıda is júzinde 354 adam eńbek etedi. Sonda ár ormanshyǵa eki ese aýyrtpalyq túsedi. Ulttyq park avtokólikpen 70%, traktorlarmen – 35%, basqa arnaıy tehnıkamen 4-ten 20%-ǵa deıin, al ınspektorlardy kólikpen qamtý 36% qamtamasyz etilgen. Mundaı jaǵdaıda erekshe qorǵalatyn tabıǵı aýmaqtardy sapaly qorǵaý men kúzetý múmkindigi az.

Cenatordyń sózine qaraǵanda, vahtalyq ádispen jumys isteıtin ormanshylarǵa basqa vahtashylar sııaqty dalalyq jabdyqtaý aqshasy tólenbeıdi. Óıtkeni, orman sharýashylyǵynyń qyzmetkerleri mundaı tólemge quqyǵy bar qyzmetkerler sanatynyń tizbesine kirmeıdi.

«Ulttyq parktiń shekteýli sharýashylyq qyzmet aımaǵynda janama orman paıdalaný, bal ara sharýashylyǵy, sanıtarlyq maqsatta aǵash kesý jáne basqa da qyzmet túrlerine ruqsat berilgen. Alaıda, aǵash kesýshilerdi esepke alý men jınaýǵa ruqsat alýdyń qoldanystaǵy júıesi bir jylǵa deıin sozylatyn kóp satyly kelisý rásimderin talap etedi. Sondyqtan da, ýákiletti organnyń ruqsat berý fýnktsııalaryn jergilikti deńgeıge berý zańnamalyq turǵydan rettelip, sheshilýi qajet dep esepteımin. Sonymen qatar, jergilikti halyqtyń suranysyna oraı, zańnamadaǵy janama paıdalaný tizbesine qaraǵaı jańǵaqtaryn jınaý da engizilýi tıis», - dep atap ótti Dúısenǵazy Mýsın.

Depýtat sonymen qatar ulttyq park qyzmetkerleriniń eńbekaqysyn arttyrý, ekotýrızmdi damytý úshin ınfraqurylymdy jańǵyrtý, zamanaýı zerthanalarmen qamtamasyz etý jáne ǵylymı-zertteý jumystaryn jetkilikti qarjylandyrý qajettigin atap ótti.