Dúısenbide Qazaqstannyń soltústiginde ótkinshi jańbyr jaýady
ASTANA. QazAqparat - Dúısenbi kúni Qazaqstannyń soltústik óńirlerinde atmosferalyq aǵyndardyń ótýimen naızaǵaı oınap, ótkinshi jańbyr jaýady, jel kúsheıedi. Keı jerlerde tuman túsedi, dep habarlady «Qazgıdromet» RMK.
Batys Qazaqstan, Pavlodar, Qostanaı, Aqmola, Qaraǵandy jáne Shyǵys Qazaqstan oblystarynda keı jerlerde naızaǵaı oınap, jel 15-20 m/s-qa deıin kúsheıedi.
Soltústik Qazaqstan oblysynda keı jerlerde naızaǵaı oınaıdy, jel 15-20 m/s-qa deıin kúsheıedi, túnde jáne tańerteń tuman túsedi.
Aqtóbe oblysynda kúndiz keı jerlerde jel 15-20 m/s-qa deıin kúsheıedi.
Kúndiz Almaty oblysynda aptap ystyq bolady.
Aqtóbe, Qyzylorda, Ońtústik Qazaqstan, Almaty oblystarynda, Jambyl, Batys Qazaqstan, Atyraý, Qaraǵandy, Shyǵys Qazaqstan oblystarynyń basym bóliginde, Aqmola oblysynyń keı jerlerinde óte joǵary órt qaýpi saqtalady.
