Dúısenbi kúni elimizdiń basym bóliginde jel kúsheıip, boran soǵady - Qazgıdromet
ASTANA. QazAqparat - 19 qańtarda elimizdiń kóp aımaqtary frontaldy bólikterdiń yqpalynda bolǵandyqtan, qar jaýady, burqasyn, tuman, kóktaıǵaq bolady, jel kúsheıedi. Tek batysta jáne ońtústik-shyǵysta kún ashyq bolady, dep habarlaıdy «Qazgıdromet» RMK.
Qostanaı oblysynda boran soǵyp, tuman túsedi, kúndiz jeldiń 15-20 m/s deıin kúsheıýi kútiledi. Soltústik Qazaqstan oblysynyń keı jerlerinde kóktaıǵaq bolady, burqasyndatyp jel soǵady, onyń ekpini 15-20 m/s. Pavlodar oblysynda jaıaý burqasynmen jel kúsheıedi (15-20 m/s). Atyraý, Batys Qazaqstan, Qaraǵandy oblystarynyń keı jerlerinde tuman bolady. Ońtústik Qazaqstan oblysynyń keı jerlerinde tuman túsip, kóktaıǵaq bolady, túnde jáne tańerteń jeldiń ekpini 15-20 m/s deıin kúsheıedi. Qyzylorda oblysynyń keı jerlerinde kóktaıǵaq bolady. Aqmola oblysynda túnde jáne tańerteń keı jerlerde tuman bolady, kúndiz jaıaý borasyn soǵyp, jel 15-20 m/s kúsheıedi. Almaty oblysynyń Jalańashkól aýdanynda jel 17-22, ekpini 25 m/s kúsheıedi, túnde keı jerlerde tuman bolady. Shyǵyǵs Qazaqstan oblysynyń keı jerlerinde túnde tuman bolady, kúndiz Jarma aýdanynda jel 15-20 m/s kúsheıedi.
