Dúısenbi kúngi aýa raıy boljamy

NUR-SULTAN. QazAqparat – 8 tamyzda atmosferalyq frontaldy bólikterdiń ótýimen elimizdiń ońtústik jartysy men soltústiginde jańbyr jaýady. Kúndiz soltústikte jáne ońtústik-shyǵystyń taýly aýdandarynda qatty jańbyr jaýady, sondaı-aq naızaǵaı, ekpindi jel, burshaq pen daýyl kútiledi. Qazaqstannyń qalǵan bólikterinde dúısenbi jaýyn-shashynsyz ótedi. Respýblıkanyń ońtústiginde kúndiz shańdy daýyl boljanady, dep habarlaıdy QazAqparat «Qazgıdromet» RMK-ǵa silteme jasap.

Atap aıtqanda, tańerteń jáne kúndiz Qaraǵandy oblysynyń batysynda, soltústiginde, shyǵysynda, kúndiz Aqmola oblysynyń shyǵysynda, Jambyl, Túrkistan oblystarynyń taýly aýdandarynda qatty jańbyr jaýady.

Kúndiz Batys Qazaqstan oblysynda qatty ystyq kútiledi, Atyraý oblysynda qatty ystyq saqtalady.

Qyzylorda oblysynyń basym bóliginde, Túrkistan oblysynyń ońtústiginde, shyǵysynda, Atyraý oblysynyń soltústiginde tótenshe órt qaýpi kútiledi.