Dýshanbeden Astanaǵa alǵashqy halyqaralyq poıyz keldi

ASTANA. QazAqparat - Jeksenbiden dúısenbige qaraǵan túni Astanaǵa «Dýshanbe-Astana» baǵytyndaǵy alǵashqy jolaýshylar poıyzy keldi, dep habarlaıdy «Jolaýshylar tasymaly» AQ baspasóz qyzmeti.

Aıta ketken jón, budan buryn Qazaqstan men Tájikstan astanalarynyń arasyndaǵy tikeleı temirjol baǵyty bolmaǵan edi. Bul marshrýt «EKSPO-2017» kórmesin ótkizý kezeńinde týrızmdi damytýǵa óziniń úlesin qosatyn bolady.

Poıyzdy iske qosý sheshimi «Qazaqstan temir joly» UK» AQ men «Tájik temir joly» MBK basshylarynyń arasyndaǵy kelisimge sáıkes qabyldandy. Halyqaralyq poıyz baǵyty Tájikstan men Qaraqalpaqstannan keıin Beıneý-Sekseýil-Jezqazǵan jańa joldaryn qamtyp, osy baǵyttaǵy jolaýshylar aınalymyn ulǵaıtýǵa múmkindik beredi.

Poıyz 9 vagonnan turady jáne Dýshanbeden beısenbi kúni, al «Astana-Nurly joldan» dúısenbi kúnderi jolǵa shyǵady.