Dýshanbede TMD Úkimet basshylary keńesiniń otyrysy bastaldy

ASTANA. QazAqparat - Tájikstan astanasynda Táýelsiz Memleketter Dostastyǵy Úkimet basshylary keńesiniń otyrysy jumysyn bastady, dep habarlaıdy «QazAqparat» HAA Hovar agenttigine silteme jasap.

TMD Atqarý komıteti baspasóz qyzmetiniń habarlaýynsha, otyrysta ekonomıkalyq, gýmanıtarlyq salalardaǵy, sondaı-aq yntymaqtastyqtyń basqa da salalaryndaǵy ózara yqpaldastyqty nyǵaıtýǵa baǵyttalǵan 14 másele qaralmaq.

Keńeıtilgen quramdaǵy otyrysta Energetıkany ınnovatsııalyq damytý jáne aldyńǵy qatarly energetıkalyq tehnologııalardy shyǵarý salasyndaǵy yntymaqtastyq tujyrymdamasyna, Kezek kúttirmeıtin sharalardy iske asyrý josparyna, TMD-ǵa múshe memleketterdiń ıntellektýaldyq menshik naryǵyn qalyptastyrý men damytý týraly kelisimge qol qoıý josparlanǵan.

Budan tys, Keńes otyrysynyń qatysýshylary elektrondy jáne elektrotehnıkalyq qondyrǵylardyń qaldyqtary; memleketaralyq standarttaý jónindegi qujattar; kedendik, ınnovatsııalyq salalardaǵy yntymaqtastyqqa qatysty qujattardy talqylaıdy. 2025 jylǵa deıingi merzimge arnalǵan Qutyrýdyń aldyn alý jáne oǵan qarsy kúres jónindegi birlesken qımyldar kesheni qabyldanady.

«Gýmanıtarlyq blok» aıasynda Úkimet basshylary keńesiniń otyrysynda Táýelsiz Memleketter Dostastyǵyna múshe memleketterdiń Oqytýshylar jáne bilim berý salasy qyzmetkerleriniń sezi týraly ereje jáne «TMD úshin 100 ıdeıa» Halyqaralyq jastar jobasy qaralady.

Sondaı-aq TMD Úkimet basshylary keńesiniń otyrysynda qarjy jáne kadrlar máselelerine qatysty birqatar sheshimder qabyldanýy josparlanyp otyr.

Eske sala keteıik, TMD tóraǵalyǵy Tájikstanǵa 2018 jylǵy 1 qańtarda berilgen bolatyn.