Dýshanbede metro qurylysy týraly memorandýmǵa qol qoıyldy
ASTANA. KAZINFORM — Tájikstannyń Kólik mınıstrligi men Ońtústik Koreıa kompanııalary Dýshanbe metropolıteni qurylysy jobalaryn iske asyrý týraly memorandýmǵa qol qoıdy, dep habarlaıdy Kazinform menshikti tilshisi.
— Kelissóz qorytyndysy boıynsha Tájikstan Respýblıkasynyń Kólik mınıstrligi men Ońtústik Koreıa kompanııalary arasynda elimizdiń kólik salasyndaǵy úsh jobany iske qosý týraly ózara túsinistik týraly memorandýmǵa qol qoıyldy, onyń ishinde Kýlıab qalasy erkin ekonomıkalyq aımaǵynda logıstıkalyq ortalyq salýdyń tehnıkalyq-ekonomıkalyq negizdemesi jáne shamalanǵan jobasy, Dýshanbe qalasynda metro qurylysynyń tehnıkalyq-ekonomıkalyq negizdemesiniń aldyn ala jobasy, baǵyt 2 (Memlekettik tsırkten Dýshanbeniń «shyǵys qaqpasyna» deıin) jáne Tájikstan Respýblıkasynyń astanasynda metro qurylysy jónindegi jumys tobyna konsýltatıvtik qoldaý kórsetý jobasy bar, — dep habarlady Kólik mınıstrligi.
Bul jobalardy iske asyrý 2025 jyldyń qarashasynan 2026 jyldyń shildesine deıingi kezeńge josparlanǵan.
Jyldyń basynda Kólik mınıstrligi Dýshanbe metropolıtenin damytý josparyn usyndy. Josparǵa sáıkes, metro qala ortalyǵyn astananyń ońtústik, soltústik jáne shyǵys qaqpalarymen baılanystyratyn úsh jeliden turady.
Osyǵan deıin Almaty metrosynda 2026 jyly týrnıketter jańartylatynyn jazǵan bolatynbyz.