Dýshanbede «Qazaqstannyń bilim kúni» ótti

ASTANA. QazAqparat - Tájikstan astanasy Dýshanbede «Qazaqstannyń bilimi kúni» uıymdastyryldy. Bul jaıynda Qazaqstannyń Tájikstandaǵy elshiliginen málim boldy, dep habarlaıdy QazAqparat.

Sharanyń ashylý rásiminde sóz sóılegen Qazaqstan elshisi Nurlan Seıtimovtiń aıtýynsha, qazaq-tájik qarym-qatynasy barlyq salada, onyń ishinde bilim jáne ǵylym salalarynda da qarqyndy ári kezeń-kezeńimen damyp keledi.

«Onyń dáleli jyl saıyn turaqty ótkizilip kele jatqan búgingi Qazaqstannyń bilim kúni bola alady. Bul shara barysynda tájik jastary Qazaqstannyń jetekshi joǵary oqý oryndaryna túsý sharttarymen jan-jaqty tanysýǵa múmkindigi bar», - dedi Nurlan Seıtimov.

Al Tájikstan Bilim jáne ǵylym mınıstriniń birinshi orynbasary Rahmatýllo Mırboboev búgingi sharany uıymdastyrǵany úshin Qazaqstannyń joǵary oqý oryndaryna rızashylyǵyn aıtyp, zor jetistikterge jetýlerine tilektes ekendigin bildirdi.

Aıta keterligi, shara barysynda tájik jastary Qazaqstannyń 21 joǵary oqý ornyna qatysty ózderin qyzyqtyrǵan saýaldar boıynsha mol aqparat aldy.