Dýshanbede «Qazaqstannyń bilim berý kúnderi» kórmesi ótip jatyr

ASTANA. QazAqparat - Tájikstannyń astanasynda ótip jatqan bilim kórmesinde tájikstandyqtar oqýǵa túse alatyn Qazaqstannyń jetekshi 20-dan astam ýnıversıteti tanystyryldy, dep habarlaıdy news.tj.

Kórme 15 mamyr kúni Reseı-tájik (slavıan) ýnıversıtetiniń ǵımaratynda bastaldy jáne ol búgin jalǵasady. Kórmege Qazaqstannyń «Nazarbaev Ýnıversıteti», L.N.Gýmılev atyndaǵy Eýrazııa ulttyq ýnıversıteti, «Narhoz ýnıversıteti», M.Tynyshpaev atyndaǵy qazaq kólik jáne kommýnıkatsııa akademııasy jáne taǵy basqa 20-dan astam bilim ordalary qatysýda.

Qazaqstannyń Tájikstandaǵy dıplomatııalyq ókildiginiń basshysy Nurlan Seıtimovtyń aıtýynsha, sońǵy jyldary bul bilim kórmesine jurtshylyq jappaı qatysýda jáne bul eki el arasyndaǵy bilim berý salasyndaǵy yntymaqtastyqty,  sonyń ishinde bilim alyp jatqan jastar arasyndaǵy akademııalyq utqyrlyqty jandandyrý arqyly damytýǵa baǵyttalǵan.

Kórmege kelýshiler qazaqstandyq bilim berýdiń artyqshylyqtary men Qazaqstannyń joǵary oqý oryndarynda bilim alýdyń múmkindikteri týraly, sondaı-aq osy eldiń bilim ordalaryndaǵy bakalavrıat, magıstratýra, aspırantýra jáne ekinshi joǵary bilim sekildi bilim berý baǵdarlamalary týraly qosymsha aqparat ala alady.

Sharany Qazaqstannyń Tájikstandaǵy elshiliginiń kómegimen «Halyqaralyq baǵdarlamalar ortalyǵy» AQ jáne Tájikstan Respýblıkasynyń bilim jáne ǵylym mınıstrligi uıymdastyryp jatyr.