Dýshanbede qazaqstandyq bitimgerlerge arnalǵan estelik buryshy ashyldy
ASTANA. KAZINFORM — Tájikstan astanasynda TMD-nyń ońtústik shekaralaryn tájik-aýǵan shekarasynda qorǵaýǵa qatysqan qazaqstandyq bitimgerlerge arnalǵan estelik buryshynyń saltanatty ashylý rásimi ótti, dep habarlaıdy Kazinform agenttiginiń Dýshanbedegi menshikti tilshisi.
Іs-shara 1990-jyldary Tájikstanda beıbitshilik pen konstıtýtsııalyq qurylysty qalpyna keltirýge qazaqstandyq áskerı qyzmetshilerdiń qosqan úlesine arnalǵan ǵylymı-tanymdyq konferentsııa aıasynda uıymdastyryldy.
Sharaǵa Qazaqstan elshiliginiń ókilderi, Qazaqstan men Tájikstannyń ınternatsıonalıst-jaýyngerler qoǵamdyq uıymdarynyń músheleri, Tájikstannyń Shekara qyzmeti men Іshki ister mınıstrliginiń basshylyǵy jáne ardagerleri qatysty. Jınalǵandar qaza tapqandardy bir mınýt únsizdikpen eske aldy.
Quttyqtaý sózinde Qazaqstannyń Tájikstandaǵy elshisi Ýálıhan Tórehanov baýyrlas tájik halqyna kómek kórsetken qazaqstandyq bitimgerlerdiń erligin umytpaı, olardyń rýhyna qurmet kórsetip júrgen ardagerler qozǵalystaryna alǵys aıtty.
— Sol bir qıyn kezeńde sizder ortaq shekaramyzdy birge qorǵap, jańa beıbit ómirdi birge qalyptastyrdyńyzdar. Osy estelik urpaqtan urpaqqa berilip, halyqtarymyzdyń beıbitshiligi, qaýipsizdigi men ál-aýqaty jolynda saqtalýy úshin maıdandas dostaryńyzben jıi kezdesip turýǵa shaqyramyn, — dedi dıplomat.
Oqıǵalardyń kýágeri, Tájikstan Shekara áskerleri tóraǵasynyń burynǵy orynbasary, general-leıtenant Safaralı Saıfýlloev qazaqstandyq birikken batalonnyń alǵashqy quramyn qalaı qarsy alǵanyn eske aldy.
— Qazaqstandyq áskerı qyzmetshiler kúzetken shekara ýchaskesi eń kúrdeli aımaqtardyń biri boldy — aınala jartastar, tasty jer, birde-bir aǵash joq. Osyndaı jaǵdaıda blındajdar, transheıalar men jeke quramǵa arnalǵan lager salyndy. Osyndaı qıyn jaǵdaıda Qazbat jaýyngerleri erlikpen qyzmet atqardy, — dedi ol.
Qazaqstandyq bitimgerlerge arnalǵan jyly lebizder Tájikstannyń Shekara áskerleri ardagerleri odaǵy men Qorǵanys mınıstrligi ókilderiniń tarapynan da aıtyldy. Olar baýyrlas memlekettiń táýelsizdigi jolynda qaza tapqan sarbazdardyń batyrlyǵy men erligin erekshe atap ótti.
— Qazaqstandyq shekarashylar ózderiniń tikeleı mindetterinen bólek, jergilikti turǵyndarǵa turmystyq máselelerdi sheshýde de rııasyz kómek kórsetti. Óz kezeginde jergilikti halyq qazaqstandyqtarǵa erekshe iltıpat tanytyp, Pıandj ózeniniń arǵy betinen bolýy múmkin arandatýlar týraly eskertip otyrǵan. Aýyl turǵyndary olardy qadirli qonaq retinde toılarǵa, bala týý qýanyshtaryna jáne basqa da merekelik sharalarǵa shaqyratyn. Bir sózben aıtqanda, qazaq baýyrlarymyz árdaıym tórden oryn alǵan qadirli qonaq boldy. Olardyń rýhy júregimizde máńgi saqtalady, — dedi Tájikstan qorǵanys mınıstriniń burynǵy orynbasary Asror Latıfzoda.
1993 jyldyń qańtarynda TMD memleketteri basshylary tájik-aýǵan shekarasyn zańsyz qarýly toptardan birlesip qorǵaý týraly kelisimge qol qoıǵan bolatyn. Segiz jyl ishinde 10 myńnan astam qazaqstandyq sarbaz ben ofıtser TMD-nyń ońtústik shebin qorǵady.
1995 jyldyń sáýirinde Darvaz aýdanyndaǵy Pshıhavar shatqalynda qazaqstandyq 7-shi birikken rota tutqıyldan jasalǵan shabýylǵa ushyrap, bes saǵatqa sozylǵan shaıqas nátıjesinde 17 áskerı qyzmetshi qaza taýyp, ondaǵan adam jaralanǵan. Qaza tapqan bes jaýynger II dárejeli «Aıbyn» ordenimen, taǵy on eki áskerı qyzmetshi «Jaýyngerlik erligi úshin» medalimen marapattaldy.
Qazaqstandyq jaýyngerlerdiń erligine taǵzym retinde 2007 jyly Dýshanbedegi Fırdaýsı atyndaǵy saıabaqta jáne 2019 jyly Darvazdaǵy qaza tapqan sarbazdar qyzmet etken jerde eskertkish memorıaldyq taqtalar ornatyldy. Búginde adamdar bul jerlerge jyl saıyn gúl shoqtaryn qoıyp, batyrlardy eske alady.
Aıta ketelik Qazaqstandyq bitimgerler Golan jotalarynda 90-nan astam turǵynǵa medıtsınalyq kómek kórsetti.
