Dýshanbede Qazaqstan dıplomatyna shabýyl jasaldy
ASTANA. 11 sáýir. QazAqparat /Rýslan Ǵabbasov/ - Dýshanbede Qazaqstan dıplomatyna shabýyl jasaldy. Bul týraly búgin Astanada ótken aptalyq brıfıngte Syrtqy ister mınıstrliginiń resmı ókili Asqar Ábdirahmanov málim etti.
Resmı ókildiń aıtýynsha, Dýshanbedegi Qazaqstan Respýblıkasy Elshiliginiń málimetine sáıkes, keshe keshki saǵat 5.00 kezinde Dýshanbeniń Aını kóshesiniń boıynda bizdiń Elshiligimizdiń ekinshi hatshysy Ámir Janaevqa jalpy sany shamamen 6-7 adamdaı (25-30 jas aralyǵyndaǵy) jergilikti ult ókilderi tarapynan shabýyl jasalǵan. Á. Janaevtyń janynda bul oqıǵa kezinde jubaıy men 4 jasar balasy bolǵan. Shabýyl nátıjesinde Elshilik qyzmetkeri birqatar jaraqat alǵan.
Qazirgi kezde onyń densaýlyq jaǵaıy qalpyna kelýde. «Bir ókinishtisi, jergilikti polıtsııa ókilderi oqıǵa ornyna tek 20 mınýttan keıin ǵana kelgen. Sondaı-aq, kósheniń boıyndaǵy jergilikti turǵyndar oǵan eshqandaı kómek kórsetpegen»,-dedi A. Ábdirahmanov.
Resmı ókildiń aıtýynsha, QR Elshiligi bul jóninde Tájikstannyń bılik oryndaryna tıisti málimdeme jasady. Bul málimdemede ultshyldyq jáne shovınıstik áreketterdiń ultaralyq arandatýǵa soqtyrýy múmkin ekenine alańdaýshylyq bildirildi. Sondaı-aq Tájikstan bılik organdary buzaqylardy tez arada anyqtap, olardy ustaıtynyna senim bildirildi. Dýshanbeniń quqyq qorǵaý organdary osy máselege baılanysty qylmystyq is qozǵady.
