Dýshanbede balalarǵa arnalǵan 35 myńnan astam jalǵan dári tárkilendi
ASTANA.KAZINFORM — Tájikstan astanasy Dýshanbede jalǵan dári-dármek óndirýmen aınalysqan jasyryn tseh áshkerelendi.
Qalalyq Іshki ister basqarmasynyń málimetinshe, uıymdasqan qylmystyq top qaýipsizdik talaptaryna sáıkes kelmeıtin sapasyz ári qoldan jasalǵan dárilik preparattardy óndirip, taratýmen aınalysqan.
Vedomstvonyń habarlaýynsha, sanıtarlyq talaptar saqtalmaǵan jaǵdaıda jáne sapa standarttaryn óreskel buza otyryp, «Nýrofen», «Ambrobene Ekstra», «Paratsetamol», «Ambroksol», «Lazolvan», «Teraflıý-M» jáne basqa da dárilik preparattardyń untaqtary men shárbattary daıyndalǵan. Bul dáriler negizinen balalardy emdeýge arnalǵan bolǵan.
Arnaıy operatsııa barysynda 35,9 myń quty shárbat, 405 myńnan astam qaptama, nusqaýlyq pen zattańba, 600 keliden astam shıkizat, sondaı-aq dári óndirýge arnalǵan 10 birlik qural-jabdyq tárkilendi.
Іshki ister basqarmasynyń málimdeýinshe, qylmystyq top múshelerin ustaý jáne jaýapkershilikke tartý eń aldymen azamattardyń, ásirese balalardyń densaýlyǵy men ómirin qorǵaýǵa múmkindik berdi.
Atalǵan fakti boıynsha Tájikstan Respýblıkasynyń Qylmystyq kodeksiniń birneshe baby boıynsha qylmystyq is qozǵalyp, tergeý amaldary júrgizilip jatyr.
Aıta keteıik, birinshi toqsanda Tájikstanǵa shamamen 11 000 qazaqstandyq týrıst barǵan.
