Dýshanbede Abaıdy eske alý rásimi ótti
ASTANA. KAZINFORM – Tájikstan astanasynda qazaq dıasporasynyń ókilderi men elshilik qyzmetkerleri qazaqtyń uly aqyny, fılosofy jáne aǵartýshysy Abaı Qunanbaıulynyń týǵan kúnine oraı onyń eskertkishine gúl shoqtaryn qoıdy, dep habarlaıdy Kazinform menshikti tilshisi.
Qazaqstan elshisi Ýálıhan Tórehanov quttyqtaý sózinde Abaıdyń esimi danalyq, gýmanızm, bilimge umtylý, ózara túsinistik jáne halyqtar arasyndaǵy rýhanı kelisimniń máńgilik sımvoly ekenin atap ótti.
- Onyń ilimderi búgingi kúnge deıin ózektiligin joǵaltqan joq. Kerisinshe, olar jas urpaqty bilim alýǵa, shyǵarmashylyqpen jumys isteýge jáne joǵary adamgershilik qundylyqtardy ustanýǵa shabyttandyrady, - dedi dıplomat.
Ol 2024 jyly Tájikstan astanasynda Abaı eskertkishiniń ashylýynyń erekshe tarıhı jáne rýhanı mańyzy bar ekenin atap ótti. Bul Qazaqstan men Tájikstan halyqtary arasyndaǵy dostyq pen ózara qurmettiń, sondaı-aq olardyń ortaq mádenı qundylyqtarǵa adaldyǵynyń aıqyn belgisi.
- Músinniń uly Fırdoýsı atyndaǵy saıabaqta ornalasýynyń da erekshe sımvoldyq máni bar. Fırdoýsı tájik halqynyń rýhanı áleminiń shyńy bolsa, Abaı – qazaq halqynyń rýhanı tiregi sanalady. Uly oıshyldardy aǵartýshylyq, ádilettilik, gýmanızm jáne sóz qudiretine ortaq qurmetpen qaraý biriktirip otyr, - dep qorytyndylady Ýálıhan Tórehanov.
«Tájikstan-Qazaqstan» dostyq qoǵamynyń hatshysy Qaıyrjan Qurbonova Abaı Qunanbaıulyn tek qazaq halqy ǵana emes, búkil álem qurmetteıtinin atap ótti.
- Abaıdyń fılosofııasy óte názik jáne tereń. Abaı shyǵarmashylyǵynyń shyńy – onyń áıgili «Qara sózderi». Bul adam tabıǵaty, qoǵam, adamgershilik, jaýapkershilik jáne jeke tulǵanyń ómirdegi orny týraly tereń fılosofııalyq oı. Bizdiń dostyq qoǵamymyz bul shyǵarmany tájik tiline aýdarýǵa jáne jarııalaýǵa úles qosqanyna óte qýanyshtymyn, - dep atap ótti Qurbonova.
Merekelik shara Abaıdyń áıgili «Kózimniń qarasy» jáne «Jelsiz túnde jaryq aı» ánderiniń oryndalýymen jalǵasty. Qonaqtar men elshilik qyzmetkerleriniń balalary uly aqynnyń shyǵarmalarynan úzindiler oqydy.
Osyǵan deıin Almatyda Abaı kúnine oraı ádebı, mádenı jáne aǵartýshylyq baǵyttaǵy birqatar is-shara uıymdastyrylatynyn jazdyq.
Astana qalasy Bilim basqarmasynyń uıymdastyrýymen «10 tamyz — Abaı kúnine oraı» qalada uly aqynnyń ádebı-rýhanı murasyn nasıhattaýǵa arnalǵan onkúndik is-sharalar bastaý aldy.
