Dýshanbe turǵyndary qazaqstandyq kólikterdi minetin boldy
ASTANA. QazAqparat - Dýshanbe avtoparki Qazaqstanda jınaqtalǵan bir jarym myń «Peugeot 301» avtomobıli men bes júz «JAC S3» kóligimen tolyǵady.
«ESK «KazakhExport» AQ «SaryarqaAvtoProm» JShS jáne «Hyundai Trans» Auto» JShS - Qazaqstannyń mashına jasaý ókilderin tarta otyryp, Tájikstannyń kásipkerlerimen jáne memlekettik organdarymen birqatar kezdesýler ótkizdi, dep habarlady Kazpravda.kz.
Sondaı-aq Tájikstandaǵy QR elshiliginiń qoldaýymen Dýshanbe tóraǵasynyń kólik máseleleri boıynsha orynbasary Saıdzoda Kýrbon Tagaımen Tájikstan astanasynyń kommýnaldyq tehnıka parkin jańartý máselelerin talqylaý boıynsha kezdesý uıymdastyryldy.
Kezdesýlerdiń nátıjesi boıynsha «SaryarkaAvtoProm» JShS «Holdıng Azııa Grýpp Tájikstan» kompanııasymen Dýshanbe parkin jańartý úshin Qazaqstanda jınaqtalǵan bir jarym myń «Peugeot 301» avtomobıli men bes júz «JAC S3» kóligin jetkizý boıynsha yntymaqtastyq týraly memorandýmǵa qol qoıdy.
Kelisimshart quny $24 mln. baǵalanýda. Taraptar «KazakhExport» qarjylaı-saqtandyrý qoldaýymen iske asyrylatyn osy jobany daıyndaý jáne iske asyrý boıynsha jumys tártibin ýaǵdalasty, delingen aqparatta.
«SaryarkaAvtoProm» kompanııasy 2010 jyly tirkelgen, túrli brendti jeńil kólikter shyǵarady.
Qazaqstandyq kásiporynnyń jańa áriptesi «Holdıng Azııa Grýp Tájikstan» korporatsııasy Tájikstandaǵy iri kompanııalardyń biri bolyp tabylady. Holdıng avtomobıldik tasymaldaý, avtokólik, sondaı-aq bank salasynda jumys isteıtin birneshe kóliktik kompanııalardy qamtıdy.
