Dýshanbe TMD memleket basshylarynyń sammıtin ótkizýge daıyndalyp jatyr

ASTANA. KAZINFORM – Qazan aıynda Tájikstan astanasy halyqaralyq mańyzdy sharalar alańyna aınalady.  9-10 qazan kúnderi Dýshanbede TMD Memleket basshylarynyń sammıti men «Ortalyq Azııa – Reseı» formatyndaǵy kezdesý ótedi, dep habarlaıdy Kazinform menshikti tilshisi. 

TR Syrtqy ister mınıstrliginde ótken brıfıng barysynda TMD basqarmasynyń basshysy Sharaf Rahımı Tájikstan Respýblıkasynyń 2025 jyly TMD-ǵa tóraǵalyǵynyń negizgi qorytyndylary, sondaı-aq Dostastyq sammıtine daıyndyq barysy týraly aqparatty usyndy.

Baıandamashy kún tártibindegi ózekti máselelerdiń qatarynda saıası ózara is-qımyldy nyǵaıtý jáne óńirlik qaýipsizdikti qamtamasyz etý, ekonomıkalyq yntymaqtastyqty damytý, mádenı-gýmanıtarlyq baılanystardy keńeıtý máseleleri bar ekenin atap ótti.

- Aldaǵy sammıt aıasynda birqatar mańyzdy sheshimder men málimdemeler qabyldaý josparlanǵan, sonyń ishinde BUU qurylýynyń 80 jyldyǵy, Chernobyl atom elektr stantsııasyndaǵy apattyń 40 jyldyǵy, ulttyq qylmys, lańkestik jáne ekstremızmge qarsy kúres máseleleri bar. Sondaı-aq TMD aýmaǵynda kóshi-qon jáne eńbek qyzmeti qujattary sońǵy satyda tur, - dedi Sh.Rahımı.

Ol sammıttiń Dostastyqtyń damýyna tyń serpin berip, qatysýshy elderdiń birligin nyǵaıta túsetinin qosyp ótti. Sondaı-aq Dýshanbe sammıti aıasynda memleket basshylarynyń «Ortalyq Azııa-Reseı» formatyndaǵy kezdesýi ótedi.

Aıta keteıik, Qazaqstan TMD-da birinshi bolyp týrızm statıstıkasyna mobıldi derekterdi engizdi.