Durys jylý bermegeni úshin «ArselorMıttal Temirtaýǵa» aıyppul salyndy

ASTANA. QazAqparat - «ArselorMıttal Temirtaý» AQ-ǵa qubyrdaǵy sýdyń jetkilikti deńgeıde jylytylmaǵany úshin aıyppul salyndy, dep habarlaıdy QR Energetıka mınıstrliginiń baspasóz qyzmeti.

QR Energetıka mınıstriligi Atomdyq jáne energetıkalyq qadaǵalaý men baqylaý komıtetiniń Qaraǵandy oblysy boıynsha aýmaqtyq departamenti Temirtaý qalasy ákiminiń hatyna sáıkes, «ArselorMıttal Temirtaý» AQ JEO-2-ge qatysty jospardan tys tekseris júrgizgeni habarlandy.

Tekserý barysynda «ArselorMıttal Temirtaý» AQ jylý maýsymy bastalǵaly beri JEO-2-de bekitilgen temperatýralyq kestege sáıkes jylý tasyǵysh temperatýrasynyń saqtalmaıtyndyǵy anyqtalǵan. Jylý maýsymynda qubyrdaǵy sýdyń jetkilikti deńgeıde jylytylmaǵan 8 faktisi anyqtalǵan.

Tekserý nátıjesi boıynsha, «ArselorMıttal Temirtaý» AQ-ǵa 481 000 teńge (200 AEK) somasynda aıyppul salynyp, ákimshilik jazaǵa tartyldy.