Durys tamaqtanbaý qaterli isikke ákeledi – onkolog
PETROPAVL. QazAqparat – Soltústikqazaqstandyq onkolog-dáriger Habdyrahman Berkimbaev ishetin asymyzdyń qaterli isiktiń damýyna áser etetinin eskertedi. Maman obyrdan saqtaný úshin kúnine eń keminde 5 ret kókónis pen jemis jeýge keńes beredi, dep habarlaıdy QazAqparat tilshisi.
SQO kópbeıindi aýrýhananyń onkologııalyq ortalyǵynyń radıologııa bólimshesiniń meńgerýshisi Habdyrahman Berkimbaevtyń aıtýynsha, qaterli isiktiń keı túrlerin belgili bir kezeńde emdep-jazýǵa bolady. Áli kúnge deıin obyrdyń naqty neden paıda bolatyny anyqtalǵan joq. Alaıda qaýipti derttiń aldyn alýǵa bolady.
«Eń birinshi kútiný qajet. Eńbek pen demalystyń ara jigi bolýy kerek. Árıne, sportpen aınalysýdyń densaýlyqqa tıimdiligin aıtpasa da bolady.
Jaǵymsyz emotsııalarǵa jol bermeńiz jáne ishetin tamaǵyńyzdy josparlap úırenińiz», - deıdi dáriger.
Mamannyń aıtýynsha, qaterli isikke ákeletin negizgi faktorlardyń biri – durys tamaqtanbaý. Aýrýdan aman bolý úshin talǵap jeý qajet.
«Súrlengen ónimnen, qýyrylǵan, konservilengen, marınadtalǵan, tuzdalǵan jáne natrıı nıtrıti qosylǵan taǵamdardan barynsha bas tartqan durys.
Qatty ystyq shaı men tamaqty asa ystyq kúıinde ishýge bolmaıdy. Alkogolden bas tartyńyz.
Sońǵy kezde syrany mólsherden kóp ishetinder kóbeıgen. Qazirgi syralar obyrdyń paıda bolýyna áser etedi. Sondaı-aq bul ishimdik semizdikke ákelip, aǵzadaǵy gormondy tepe-teńdikti buzady. Chıpsy, popkorn, frı kartoby densaýlyqqa zııan. Al biz ony tipti balalarǵa beremiz», - deıdi Habdyrahman Berkimbaev.
Dáriger kúndelikti mázirge mindetti túrde kókónis pen jemisti engizýge keńes beredi.
«Kókónis pen jemis-jıdekti, ósimdikten jasalǵan ónimderdi, sonyń ishinde shyryndy kúnine eń keminde bes ret tutynǵan jón. Burshaq tuqymdastardy, pııaz ben sarymsaqty, kepken jemisterdi, sút jáne balyq ónimderin as mázirine kirgizý kerek. Maıly taǵamdy azaıtyp, dene salmaǵyn qalypty deńgeıde ustaýǵa tyrysý qajet. Durys tamaqtaný nátıjesinde aǵzaǵa qajetti dárýmenderdi alyp qana qoımaı, emdelemiz de», - deıdi onkolog-dáriger.
