Durys sheshim – Abylaı Myrzahmetov Qazaqstanda tótenshe jaǵdaı rejımin uzartý jaıly
«Menińshe, bul - óte durys sheshim. Óıtkeni sarapshylardyń báriniń osyǵan deıin orta eseppen 15 mamyrǵa deıin tótenshe jaǵdaı aıaqtalady degen boljamy bolǵan edi. Prezıdent 11 mamyrdan bastap tótenshe jaǵdaı rejımi aıaqtalatynyn aıtty. Bul - jaqsy habar», - dedi Abylaı Myrzahmetov Ulttyq kásipkerler palatasynyń Facebook paraqshasynda onlaın rejımde sóılegen sózinde.
Palata basshysy degenmen qaýip baryn umytpaý kerektigin de tilge tıek etti.
«Sondaı-aq 1 mamyrdan bastap Nur-Sultan men Almaty qalalarynda áýe reısteri iske qosylatyny aıtyldy. Osyǵan deıin medıtsına mamandary adamdardyń arasyndaǵy eki metrlik qashyqtyqtyń saqtalýy kerektigin sanamyzǵa quıdy. Adamdar bul rette ushaqqa maska kıip kelýi kerek. Olardyń temperatýrasy ólshenedi. Meniń oıymsha, osy tártiptiń bárin saqtaý úshin bálkim bir sanıtarlyq sertıfıkat tapsyrý máselesin qolǵa alý kerek bolar. Óıtkeni jaýapkershilikpen birge ony qadaǵalaıtyn da ereje bolýy tıis. Osynyń bárin tutynýshylar, olarǵa qyzmet kórsetýshiler, taýar satýshylar jáne kásipkerler – bárimiz naqty saqtaıtyn bolsaq, qaýipti derttiń ary qaraı asqynýyna jol bermeımiz», - dedi ol.
Eske sala ketsek, QR Prezıdenti Qasym-Jomart Toqaev tótenshe jaǵdaı rejımin bıylǵy 11 mamyrǵa deıin uzartý jóninde sheshim qabyldady. Bul týraly Memleket basshysy búgingi málimdemesinde aıtqan bolatyn. Sonymen qatar Úkimet 1 mamyrdan bastap elorda men Almaty arasyndaǵy reısterdi ashatyn boldy.