Dýrov Google men Amazon-ǵa balama retinde jańa Cocoon platformasyn tanystyrdy
ASTANA. KAZINFORM — Dýbaıdaǵy Blockchain Life 2025 forýmynda Telegram-diń negizin qalaýshy jáne TON ekojúıesiniń quryltaıshysy Pavel Dýrov Cocoon (Confidential Compute Open Network) dep atalatyn jańa platformany tanystyrdy, dep habarlaıdy Kazinform agenttigi.
Joba detsentralızatsııalanǵan esepteý jelisin qurýǵa baǵyttalǵan, ol ásirese jasandy ıntellekt salasynda Google Cloud jáne Amazon AWS sııaqty ortalyqtandyrylǵan bulttyq qyzmetterdiń alternatıvasy bola alady.
Dýrovtyń sózderine qaraǵanda, qazirgi zamanǵy JI-qyzmetter áli de paıdalanýshylardyń jeke derekterine qol jetkize alatyn ortalyqtandyrylǵan provaıderlerge táýeldi.
— Mundaı servısterdiń basym bóligi áli de ortalyqtandyrylǵan JI jetkizýshilerine táýeldi. Olar sizdiń derekterińizdi jınap, modelderdi oqytý úshin paıdalana alady, sizdiń profılińizdi qurastyryp, sizdi manıpýlıatsııalaı alady. Keıbireýleri buny qazirdiń ózinde jasap jatyr, — dedi ol.
Cocoon — bul esepteý qýattarynyń taratylǵan jelisi, munda vıdeokartalardyń ıeleri olardy jalǵa bere alady, al ázirleýshiler jasandy ıntellekt tapsyrmalary úshin osy resýrstardy paıdalana alady, qyzmetterdi Toncoin tokenderimen tóleıdi. Barlyq esepteýler shıfrlanady, bul derekterdiń tolyq qupııalylyǵyn qamtamasyz etedi.
— Jabdyq ıeleri ózderiniń grafıkalyq protsessorlaryn barlyǵyna qoljetimdi ete alady: jelige, ázirleýshilerge, Telegram-ǵa jáne TON arqyly syıaqy alý múmkindigine ıe bolady. Eń bastysy: bul bári tolyqtaı jeke, tolyqtaı qupııaly, — dep atap ótti Dýrov.
Cocoon jelisi TON blokcheıniniń ústinde jumys isteıdi, jasandy ıntellekt, krıptografııa jáne taralǵan esepteýler tehnologııalaryn biriktiredi.
Joba komandasynyń derekteri boıynsha, Cocoon suranys pen usynysqa baılanysty dınamıkalyq túrde ózgeretin baǵalarymen, syıaqy júıesi aıqyn jahandyq esepteý qýattarynyń naryǵyn quratyn bolady.
Jeliniń alǵashqy iri qoldanýshysy Telegram bolady. Messendjerdiń keıbir JI-fýnktsııalary, mysaly, daýystyq habarlamalardy óńdeý jáne chat-bottardyń jumysy, Cocoon ınfraqurylymynda júzege asyrylatyn bolady.
— Biz II salasyndaǵy esepteýler úshin detsentralızdengen jeli qurýdy sheshtik. Birinshi ıdeıalardyń biri ony PAIN — Private Artificial Intelligence Network dep ataý boldy. Biraq keıin men sahnaǵa shyǵaryp: «PAIN álemine qosh keldińizder» deý sál qyzyq bolar dep oıladym. Sondyqtan biz sál sáttirek ataýyn oılap taptyq — Cocoon: Confidential Compute Open Network, — dedi Dýrov.
Cocoon-nyń detsentralızdengen qurylymy jasandy ıntellekt úshin esepteý resýrstaryn qazirgi tańda bulttyq ınfraqurylymǵa qymbat shyǵyndarǵa tap bolatyn startaptar men shaǵyn kompanııalar úshin qoljetimdi etýi tıis. Іri tehnologııalyq korporatsııalarǵa táýeldilikti joıa otyryp, jeli óńirlik ázirleýshiler men táýelsiz jobalarǵa jańa múmkindikter asha alady.
Sonymen qatar anonımdi tranzaktsııalar men ortalyqtandyrylǵan baqylaýdyń bolmaýy retteýshilerdiń nazaryn aýdarýy múmkin. Kópshilikke taralý úshin, yqtımal túrde, paıdalanýshylardy tekserý jáne erejelerge sáıkestikti qamtamasyz etetin qosymsha quqyqtyq mehanızmderdi qurý qajet bolady.
Eske sala keteıik, buǵan deıin Dýrov Lývrdan urlanǵan zergerlik buıymdardy qaıtaryp alýǵa daıyn ekenin jazǵan edik.