Dýrov Frantsııada ne úshin aıyptalyp jatqanyn túsinbeıdi
ASTANA. KAZINFORM – Telegram negizin qalaýshy Pavel Dýrov Frantsııa bıliginiń ony ne úshin aıyptap otyrǵanyn túsine almaıtynyn málimdedi, dep habarlaıdy TASS aqparat agenttigi.
- Maǵan ózimdi naqty ne úshin aıyptap jatqany áli túsiniksiz. Bastapqyda olar biz zańdy talaptarǵa jaýap bermedik degendi aıtqan, biraq olaı emes. Tipti eger olaı bolsa da, «qatysýdy» osylaı túsindirý óte alys. Zańgerler pretsedent joqtyń qasy deıdi, - dep málimdedi Dýrov amerıkalyq jýrnalıst Taker Karlsonǵa bergen suhbatynda.
Ol buryn Frantsııada «qylmyskerler úshin arnaıy jasalǵan, banktik shottary joq, aýdıtsiz shaǵyn qosymshalar qýdalanǵanyn» atap ótti.
- Telegram – múldem basqa deńgeı: mıllıard paıdalanýshy, aýdıtorlyq tekseris, ashyqtyq, - dep qosty ol.
Pavel Dýrov taǵylǵan aıyptardyń qısynsyzdyǵyn atap ótti.
- Olar (Frantsııa bıligi – red.) Telegram-nyń mıllıardtaǵan paıdalanýshylarynyń arasynda zańsyz árekettermen aınalysatyndar bar ekenin, al men munyń aldyn alý úshin jetkilikti áreket jasaǵan joqpyn dep aıtady. Biraq bul qısynsyz. Bul Donald Trampty (AQSh prezıdenti) 350 mln amerıkalyq azamattyń biri qylmys jasaǵany úshin tutqyndaýmen birdeı nemese Makrondy (Frantsııa prezıdenti Emmanıýel) Týlýzadaǵy tonaý úshin túrmege jabý. Bul absýrd, - dep atap ótti Telegram negizin qalaýshy.
Sonymen birge Dýrov elden shyǵýǵa shekteý qoıylǵanyna baılanysty áli Frantsııada júrgenin habarlady.
- Tergeý júrip jáne sen kúdiktilerdiń biri bolǵandyqtan elden erkin shyǵa almaısyń. Men Dýbaıda bosatyldym, jaqynda oraldym, osy aptada taǵy baramyn. Biraq bul óte shekteýli, baqylanatyn protsess, - dedi ol.
Eske sala ketsek, Reseıden shyqqan mıllıarder, Telegram negizin qalaýshy Pavel Dýrov 2024 jyldyń tamyzynda Frantsııada ustaldy.
Parıj prokýratýrasy Pavel Dýrovqa taǵylýy múmkin 12 aıypty tizip aıtqan, onyń ishinde quzyrly organdarǵa aqparat berýden bas tartý, alaıaqtyq pen esirtki satýǵa qatysynyń bolýy, balalardyń pornografııalyq vıdeolaryn saqtaýǵa, kıberqylmystarǵa, aqsha jylystatýǵa qatysýy jáne t. b. bar.