Dúrkiretip toı jasaǵandarǵa salyq salyna ma – komıtet jaýaby
ASTANA. KAZINFORM — Kesheli beri BAQ betterinde dúrkiretip toı ótkizgen jandar salyq tóleıdi degen aqparat tarap jatyr. Jańashyldyqtyń mán-jaıyn Memlekettik kirister komıtetinen suraǵan edik.
— Áńgime jeke kásipker retinde tirkelmeı kásipkerlik qyzmetpen aınalysatyndarǵa qatysty bolyp otyr. Komıtet qyzmet túrine qaramastan, jeke tulǵalardyń salyq tóleý mindetin ákimshilendirý arqyly qadaǵalaıdy. Atalǵan qyzmet túrlerimen aınalysatyn adamdar, ıaǵnı is-shara júrgizýshileri, tamadalar, ánshiler salyq mindettemelerin basqa azamattar men kásipkerler sııaqty jalpy negizde oryndaıdy, bul salyq salýdyń ádildik qaǵıdatyna sáıkes, — degen jaýap aldyq komıtetten.
Osy oraıda Kirister komıteti kameraldyq baqylaý tabys tapqan barlyq tulǵaǵa teńdeı júrgiziletinin eske salady.
Aıta ketsek, aqpannan bastap Memlekettik kirister komıteti tabysyn tómen kórsetken 594 blogerge qatysty 53,3 mlrd teńgeniń habarlamasyn jibere bastady. Tekserý, salystyrý qorytyndysy boıynsha 594 tulǵanyń tabysynda 53,3 mlrd teńgege sáıkessizdik anyqtalǵan.
Keıin tabys salyǵyn tóleýge jatatyn blogerler mıllıardtaǵan kirisin kórsete bastady.