Durys saqtalmaǵan merekelik taǵamdardan ýlaný qaýpi bar – dáriger

ALMATY. KAZINFORM – Almaty qalasynyń sanıtarııalyq-epıdemıologııalyq baqylaý departamenti basshysynyń orynbasary Gaýhar Qatkenova Jańa jyl merekesin toılaý kezindegi saqtyq sharalaryn eske saldy. 

Onyń aıtýynsha, mereke qarsańynda qoǵamdyq tamaqtaný oryndarynda adamdar sany artady jáne merekelik dastarqanǵa túrli salat, et jáne balyq taǵamdary, táttiler qoıylady.

– Dál osy kezeńde taǵamdardyń kóp daıyndalýy men uzaq saqtalýyna baılanysty tamaqtan ýlaný jaǵdaılary jıileı túsedi. Sondyqtan mereke kezinde taǵam qaýipsizdigin qamtamasyz etý – turǵyndardyń da, tamaqtaný obektileriniń de basty mindeti, - dedi ol. 

Departament ókili tamaqtan ýlanýdyń negizgi sebepterin atap ótti: maıonez qosylyp, durys saqtalmaǵan salattardy, shala pisken et jáne balyqty, bólme temperatýrasynda uzaq turǵan tez buzylatyn ónimderdi tutyný jáne t.b. 

– Ýlanýdyń belgilerine júrek aıný, qusý, ishtiń aýyrýy jáne ótýi, sondaı-aq bas aınalý, álsizdik jatady. Bul belgiler birneshe saǵattan keıin paıda bolyp, 1-2 kúnge sozylýy múmkin. Aýyr jaǵdaılarda dene qyzýynyń kúrt kóterilýi baıqalady. Osyndaı sımptomdar baıqalsa, dereý dárigerge júginý qajet, - dedi ol. 

Gaýhar Qatkenovanyń aıtýynsha, taǵamdardy tońazytqyshta +2…+4 °C temperatýrasynda saqtaý, daıyn taǵamdy bólme temperatýrasynda 2-3 saǵattan artyq qaldyrmaý, kúmán týdyrǵan ónimdi múldem tutynbaý qajet. Al qoǵamdyq tamaqtaný oryndarynyń ıeleri men qyzmetkerleri sanıtarııalyq talaptardy qatań saqtaýy tıis. 

Eske salaıyq, buǵan deıin Almatyda poıyzdaǵy ýlaný oqıǵasy boıynsha qylmystyq is qozǵaldy.