«Durys dep oılaımyn»: Sherzat isindegi aıyptalýshy óziniń uryp-soqqany jaıly

TALDYQORǴAN. KAZINFORM — Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.

Búgin sotta aıyptalýshy Nurbol Toqtaýbaevtan jaýap alynyp jatyr. Ol óz sózinde Sherzattyń aǵasy Nurqanat Ǵaıypbaevty tepkenin rastady.

Sýdıa Nurbol Toqtaýbaevtan Nurqanat Ǵaıypbaevty tepken kezde jábirlenýshi qandaı kúıde bolǵanyn surady.

— Otyrdy ma, jatty ma esimde joq. Kóz aldymda qalǵan beınesi -bizge myltyq atyp, anaıy sózderdi aıtqany jadymda saqtalyp qalǵannan keıin tóbelesýge sheshim qabyldadym, — dedi sottalýshy.

Ári qaraı sýdıa men sottalýshy arasynda qysqa suraq-jaýap boldy.

— Jańa ǵana «myltyqty kim atqanyn kórgen joqpyn, tek qana estidim, kim tartyp alǵanyn da kórgen joqpyn» dep aıttyńyz. Endi Ǵaıypbaev myltyqty atty dep otyrsyz, — sýdıa.

— Ǵaıypbaev myltyqty atty. Onyń qolynan tartyp alǵan azamatty tanymaımyn, — aıyptalýshy.

— Tartyp aldy, onyń qolynda qarý joq, Ǵaıypbaev jatyr. Siz baryp teptińiz. Óz is-áreketińizdi durys dep oılaısyz ba? — sýdıa.

— Durys dep oılaımyn, qurmetti sot. Sebebi ol bizge myltyq atty, — aıyptalýshy.

— Siz Ǵaıypbaevty teptińiz. Al polıtsııa qyzmetkerleri sizdi urdy dedińiz. Olardiki durys emes pa? — sýdıa.

— Aıaýsyzdyqpen urdy, — aıyptalýshy.

— Al siz aıaýshylyqpen tepken joqsyz ba? — sýdıa.

— Ol jerde tóbeles boldy ǵoı. Al biz polıtsııa qyzmetkerlerimen tóbelesken joqpyz, — aıyptalýshy.

Buǵan deıin sotta 4 qazan kúni bolǵan janjal beınejazbasy jarııalandy.

Ótken sot otyrysynda aıyptalýshy Darhan Áskentaıdan jaýap alyndy.

Sot barysynda sottalýshylardyń advokattary prokýrordy aýystyrýdy ótindi. Biraq sýdıa prokýrordy aýystyrýdan bas tartty.

Sonymen qatar sotta dúken kamerasyna túsken oqıǵanyń tolyq beınejazbasy kórsetildi.

Alǵashqy sot otyrysynda prokýror oqıǵanyń tolyq hronologııasyn baıandady.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.

2024 jyldyń jeltoqsan aıynda Talǵar mańynda Sherzat aǵasynyń denesi tabyldy.