Dúrbeleń týdyrǵan «Dóner kebab»
ALMATY. Shildeniń 27-si. QazAqparat - Ári-beri sabylysqan jolaýshylardyń tártibin baqylap júrgen kezekshi jasaqtyń nazary Almaty-2 vokzalyndaǵy temir jol kassasynyń aldyna áldebireýlerdiń ádeıilep qaldyryp ketken zatqa aýady.
Syrtynan qaraǵanda býyltyq-býyltyq bolyp tompaıǵan bul qapshyq kúdik týdyryp, ishinde quddy jarylǵysh zat jatqandaı bolady.
Bundaı jaǵdaıda belgilengen tártip boıynsha tıisti oryndarǵa habar bergen kezekshi jasaq jigitteri qosymsha kúsh kelgenshe vokzal alańynan adamdardy qaýipsiz jerge aýystyryp, oqıǵa ornyn zalalsyzdandyrý amaldaryna kirisedi, dep habarlady Kóliktegi Ońtústik-Shyǵys ІІD baspasóz qyzmetinen Sandýǵash Múslimova.
Jer álemdegi bolyp jatqan tosyn oqıǵalar da dál osyndaı zattan bastalyp, arty aýyr ókinishterge uryndyryp jatqany qanshama. Lańkestik áreketter beıbit turǵyndarǵa kesirin tıgizip, qyrshynynan qıyp jatqanyn kúndelikti BAQ jarııalap, kózi ashyq kórermenderdi zárezap kúıge túsirip qoıǵaly qashan.
Tótenshe jaǵdaı oryn alǵan vokzaldan adamdar men jumysshylar tez arada shyǵarylyp, «Arlan» arnaıy jasaq toby men temir jol polıtsııasy, tótenshe jaǵdaılar bólimi jáne kólik prokýratýrasy qyzmetkerleri kelip jetti. Sýyq habardy qulaǵy shalǵan halyqtyń da júzi úreıli edi.
Arnaıy qondyrǵymen álgi qapshyqty zalasyzdandyrǵan mamandar, qapshyq aýyzyn ashqanda qyran-topan kúlkige batty da qaldy. Búkil qozǵalysty toqtatyp, eldi shoshytqan qapshyq ishinen bomba emes kádimgi túrikterdiń súıikti asy «Dóner Kebab» shyqty.
