Duolingo-ny basyp ozǵan qazaqstandyq Aleem: qosymshanyń qupııasy nede

ASTANA. KAZINFORM — Qazaq jastary ázirlegen Aleem qosymshasy álemdik reıtıngte Duolingo-ny basyp ozdy. Aǵylshyn tilin úıretýdiń jańa formatyn usynǵan joba jaıly avtor Asyljan Altaı Jibek Joly telearnasynyń «Búgin LIVE» baǵdarlamasynda aıtyp berdi.

Avtordyń aıtýynsha, Aleem platformasynyń basty ereksheligi — oqý baǵdarlamasynyń ár qoldanýshyǵa jeke beıimdelýinde.

— Duolingo barlyq oqýshyǵa bir standartty baǵdarlama usynsa, Aleem ár adamnyń deńgeıi men qyzyǵýshylyǵyna qaraı jeke oqý josparyn qurady. Bizdiń maqsat — álemniń túkpir-túkpirindegi adamdarǵa, ásirese muǵalim tapshy aımaqtarǵa eń sapaly ustaz ben oqýlyqty qoljetimdi etý, — deıdi Asyljan Altaı.

Onyń aıtýynsha, aǵylshyn tilin tolyq meńgerý úshin standart boıynsha 800-1200 saǵat qajet. Osyny eskere otyryp, komanda tıimdi ári ıkemdi platforma ázirlegen.

— Bastapqyda aǵylshyn tiline arnalǵan kýrs pen oqýlyq jasadyq. Alaıda eki aıdan soń ol materıal eskirip qaldy. Sol kezde túsindik, qazir oqýlyq emes, dınamıkalyq júıe qajet. Ár adam óz qyzyǵýshylyǵyna saı, mysaly, fýtbol, mýzyka nemese kıno arqyly tildi meńgerý kerek. Osylaısha, Aleem jobasy dúnıege keldi, — deıdi avtor.

Asyljannyń aıtýynsha, jaqynda qosymshanyń jetildirilgen nusqasy iske qosylǵan.

— Paıdalanýshylardyń pikirin eskerdik. Kópshiligi «muǵalimnen qysylamyn, ChatGPT-den úırengende erkin bolamyn» dedi. Bul bizdiń negizgi motıvatsııamyz boldy, — deıdi ol.

Qosymshany daıyndaý ıdeıasy shamamen segiz aı buryn kelgen.

— Qazir aǵylshyn tilin bilý ındeksi boıynsha Qazaqstan 118 eldiń ishinde 103-orynda. Biz bul kórsetkishti jaqsartýǵa úles qosqymyz keledi. Komanda bolyp qosymshaǵa qazaq jáne basqa da tilderge beıimdeý, beınematerıaldar men kitap oqý fýnktsııalaryn qosý josparda bar, — deıdi Asyljan Altaı.

Joba avtory qosymsha tek iOS júıesinde qoljetimdi ekenin, al Android nusqasy bolashaqta ázirlenetinin jetkizdi.

— Qosymsha bir kún ishinde Qazaqstan, Qyrǵyzstan, Ózbekstan jáne Tájikstanda App Store tiziminde birinshi orynǵa shyqty. Reseı men Ázerbaıjanda ekinshi orynǵa turaqtaǵan. Al úsh kúnde álemniń 107 elinen 60 myń qoldanýshy tirkeldi. Aldaǵy ýaqytta ony jetildiremiz, — deıdi avtor.

Aıta keteıik, buǵan deıin elimizde aǵylshyn tili pánin aptasyna 5 saǵat oqytý bastamasy kóterilgen bolatyn.