Dúnıejúzin qaqtyǵystar men soǵys órti jaılap barady — Prezıdent

ASTANA. KAZINFORM — Dúnıejúzin qaqtyǵystar men soǵys órti jaılap barady. Bul týraly Astana halyqaralyq forýmynda Memleket basshysy Qasym-Jomart Toqaev aıtty. 

— Búgingi jıyn álemde belgisizdik beleń alǵan kezeńde ótip otyr. Muny jolaıryq, halyqaralyq qatynastardaǵy syn saǵaty dep sıpattasaq ta bolady. Alaıda bul tujyrymdy tarıhshylardyń enshisine qaldyrǵan jón. Qazir osy jaǵdaıǵa qalaı jaýap beretinimiz mańyzdy. Aldymyzda tańdaý tur: qandaı sheshim qabyldaımyz, qandaı qundylyqtardy qorǵaımyz?! , — dedi Qasym-Jomart Toqaev.

Memleket basshysy dúnıejúzin qaqtyǵystar men soǵys órti jaılap bara jatqanyna alańdaýshylyq tanytty.

— Byltyrǵy málimetke sáıkes, 52 memleket qarýly qaqtyǵys jaǵdaıynda turǵan. Al osyndaı qatygez áreketterden kelgen ekonomıkalyq shyǵyn 19 trıllıon dollarǵa jetti. Bul, shamamen, álemdik ІJÓ-niń 13,5 paıyzy. Degenmen osy sandardyń arǵy jaǵyndaǵy ahýal odan da qorqynyshty: qazirgi qaqtyǵystar anaǵurlym uzaq ári kúrdeli sıpatqa ıe. Oǵan kóptegen «oıynshy», tipti, eshqandaı memleketke qatysy joq toptar aralasady. Budan bólek, mundaı qaqtyǵystardyń tamyrynda túrli qaıshylyqtar jatyr. Atalǵan faktorlar beıbitshiliktiń berik ornaýyna kedergi keltirýde, — dedi Prezıdent. 

Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr.

Plenarlyq otyrysty Jibek joly telearnasynan tikeleı efırde kórýge bolady.