Dúnıejúzilik jaýyngerlik óner oıyndarynda qazaq sportshylary alǵashqy júldege ıe boldy
Saýd Arabııasynyń astanasy Er-Rııadta Dúnıejúzilik jaýyngerlik óner oıyndarynda qazaqstandyq sportshylar alǵashqy júldeni enshiledi, dep habarlaıdy Kazinform.
Elimizdiń sambo quramasy jarysty sátti bastap, delegatsııa qorjynyna alǵashqy altyn medaldi saldy. Temirlan Kólbaı (88 keli) asa tartysty ótken aqtyq aıqasta serbııalyq Vladımır Gaıchten basym tústi.
Osylaısha ol sporttyń osy túrinen Búkilálemdik jaýyngerlik óner oıyndarynda top jarǵan tuńǵysh qazaq atandy.
Temirlan kúndiz jartylaı fınalda tájirıbeli Latvııa ókili Reshkodan basym túsken edi.
Al jaýyngerlik samboda fınalǵa shyqqan Asqar Abdýlla (98 keli) Belarýs balýanynan jeńilip, kúmis medaldi qanaǵat tutty. Asqar onyń aldynda amerıkalyq jáne qyrǵyzstandyq qarsylasyn merziminen buryn jeńgen.
Sondaı-aq, qola medal jolynda 71 kelige deıingi salmaqtaǵy Saǵynysh Álipbaı belarýstik balýanynan, Elaman Qoıshybaev Armenııa sportshysynan myqty ekenin dáleldedi.
Al Ádilbek Seıisov jartylaı fınalda ózbekstandyq samboshydan jeńilip, óz salmaǵynda birden 3-oryn aldy.
Al Asyljan Orynbasarova (65 keli) men Aıjan Jylqybaeva (64 keli) júldege qol jetkize almady.
«Búgin 11 salmaqta úzdikter anyqtaldy. Bizde sonyń jeteýinde joldama boldy. Nátıjesinde bes palýanymyz júldegerler qatarynan kórindi. Tuńǵysh chempıon shyqty. Jalpy alǵanda ulttyq qurama jaqsy nátıje kórsetti dep aıta alamyn. Endi erteń komandalyq synda medal alýǵa barymyzdy salamyz», -dedi sambodan bas bapker Birjan Imahanov.
Aıta keteıik, osyǵan deıin qazaq samboshylary Búkilálemdik jaýyngerlik óner oıyndarynda bir ǵana júlde alǵan edi. Qytaı astanasy Beıjiń qalasynda ótken jarysta Arman Sanserbın (68 keli) kúmis medal alǵan edi.
Dúnıejúzilik jaýyngerlik óner oıyndaryna Qazaqstan 9 sport túrinen 53 atletten delegatsııa jasaqtap alyp keldi.
Eske salsaq, budan buryn qazaqstandyq balýandar álemdik reıtıngte kósh bastady.
