Dúnıejúzilik týrıstik uıym Qazaqstandaǵy úzdik týrıstik aýyldy anyqtady
UNWTO Dúnıejúzilik týrıstik uıymy qazaqstandyq Saty aýylyn úzdik týrıstik aýyl dep tanydy. Bas assambleıanyń Best tourism Villages by UNWTO 2023 saltanatty is-sharasy kórshiles Samarqandta ótti. Bul týraly Kazinform QR Týrızm jáne sport mınıstrliginiń baspasóz qyzmetine silteme jasap habarlaıdy.
Aıta keteıik, UNWTO-nyń «Úzdik týrıstik aýyldar» baǵdarlamasy 2021 jyly iske qosylǵan. Ol týrızmdi aýyldyq aýmaqtardyń damýy men ál-aýqatynyń qozǵaýshy kúshine aınaldyrýǵa baǵyttalǵan.
Saty – «Kólsaı kólderi» ulttyq saıabaǵynda (Almaty oblysy) ornalasqan. Onda týrıstik nysandar men attas kólder toby jáne Qaıyńdy kóli bar.
Qazirgi ýaqytta Saty qonaqúıler sany boıynsha elimizdegi kóshbasshy aýyldardyń biri sanalady. Bul – jergilikti turǵyndardyń keleli iske belsendi qatysýynyń nátıjesi.
Sonymen qatar keıingi 5 jylda munda yńǵaıly marshrýttar men serýen joldary qurylǵan, tómengi Kólsaıǵa jol salynǵan. Aýdan kóleminde adamdar toqtap dem alatyn oryndyqtar, arbalar men aılaqtar bar. Baqylaý núktesinen kól aıdynynyń panoramalyq kórinisin tamashalaýǵa bolady.
«Qazaqstanda Satynyń tabysty tájirıbesin taratý maqsatynda qazaqstandyq týroperatorlar men basqa óńirlerden kelgen qonaqúı ıeleri úshin aqparattyq týrlar, oqytý trenıngteri men semınarlar ótkiziledi. 2023 jylǵy esep boıynsha Satyda 90 qonaqúı men 30 ornalasý orny jumys isteıdi. Bul san 2019 jylmen salystyrǵanda eki ese ósken. Jergilikti turǵyndardyń kópshiligi týrıstik bıznespen aınalysady», - dedi týrızm jáne sport vıtse-mınıstri Erjan Erkinbaev.
Aıta keteıik, 2020 jyly Saty aýyly Lonely Planet halyqaralyq agenttiginiń nusqasy boıynsha jergilikti qaýymdastyqtarǵa negizdelgen týrızmniń eń jaqsy baǵyty retinde tanylyp, marapatqa ıe bolǵan.
