Dúnıejúzilik pıngvınder kúni: Antarktıka sımvolynyń sany azaıyp barady
ASTANA. KAZINFORM - 25 sáýirde ekologtar men tabıǵat janashyrlary Dúnıejúzilik pıngvınder kúnin atap ótedi, dep habarlaıdy Euronews.
Bul kún halyqaralyq uıymdardyń resmı tizimine engizilmegenimen, pıngvınderdi zertteýmen nemese qorǵaýmen aınalysatyn qaýymdastyq arasynda keńinen atalyp ótedi.
Bul kún alǵash ret 1970-jyldardyń basynda Mak-Merdo antarktıkalyq stantsııasy bazasynda jumys istegen amerıkalyq zertteýshiler bastamasymen belgilengen. Dál osy kezeńde aımaqta tirshilik etetin Adelı pıngvıni jyl saıynǵy kóshýin bastap, muz ústimen muhıtqa qaraı bet alady.
Mamandardyń aıtýynsha, bul kún merekeden góri qoǵam nazaryn pıngvınderdiń jaǵdaıyna aýdarýǵa arnalǵan. Adamdardyń sharýashylyq jumystary, muhıttardyń lastanýy jáne klımattyń ózgerýi saldarynan olardyń sany azaıyp keledi.
Qazirgi tańda ǵalymdar pıngvınderdiń 18 túrin anyqtaǵan. Sonyń ishinde úsheýi joıylyp ketý aldynda tursa, taǵy jeteýi quryp ketý qaýpi joǵary sanatqa engizilgen.
Osyǵan deıin ulybrıtanııalyq ǵalymdardyń ımperator pıngvınderiniń joıylyp ketý qaýpi bar baryna alańdaýly ekeni týraly jazdyq.
