Dúnıejúzilik oıyndarda Qazaqstan qorjynyna alǵashqy medal tústi

ASTANA. KAZINFORM – Qytaıdyń Chendý qalasynda ótip jatqan XII Dúnıejúzilik oıyndarynda karate-do sportynan Móldir Jańbyrbaı (50 keli) kúmis júldege ıe boldy. 

Otandasymyz fınalda Iran sportshysy Sara Bahmanıermen jolyqty. Negizgi ýaqyt 0:0 esebimen aıaqtalǵan edi. Tóreshiler nátıjeli áreketi úshin jeńisti qarsylasqa berdi.

Móldir irikteý kezeńinde aljırlik Sılııa Ýıkendi 4:0, venesýelalyq Iorgelıs Salazardy 3:0 esebimen jeńse, odan keıin qytaılyq Jýnhýı Vangqa 0:1 esebimen jol berdi. Al jartylaı fınalda 2 dúrkin Eýropa chempıony Ema Sgardellıden 3:2 esebimen basym túsip, fınalǵa shyqqan edi.

Bul – Dúnıejúzilik oıyndary boıynsha Qazaqstan tarıhyndaǵy nebári ekinshi medal. Buǵan deıin 2022 jyly AQSh-tyń Alabama shtatynyń Bırmıngem qalasynda Sofıa Berýltseva top jarǵan edi.

Otandastarymyz atalǵan jarysqa 1993 jyldan beri qatysyp keledi. Qazirge deıin olar 6 altyn, 4 kúmis, 7 qola júlde aldy. Qazaqstandyq sportshylar 2022 jyly AQSh-tyń Alabama shtatynyń Bırmıngem qalasynda 1 altyn, 2 kúmis, 1 qola medalmen ázirge joǵary kórsetkishke qol jetkizdi.

Bıyl jarys 34 sport túrinen ótip, 253 medal jıyntyǵy sarapqa salynady. Aıtýly dodaǵa 17 tamyzǵa deıin 114 elden 4 000 sportshy qatyspaq.

Buǵan deıin qazaqstandyq sportshylar Dúnıejúzilik oıyndarǵa qatysatynyn jazǵan edik.