Dúnıejúzilik oıyndarda djıý-djıtsýdan Seıilhan Bolatbek qola medal aldy

ASTANA. KAZINFORM — Qytaıdyń Chendý qalasynda ótip jatqan XII Dúnıejúzilik oıyndarynda djıý-djıtsýdan ne-vaza bólimi boıynsha Seıilhan Bolatbek (77 keli) qola júldeger atandy. 

Otandasymyz 3-oryn úshin talasta kanadalyq Maıkl Shıhandy 2:0 esebimen tize búktirdi.

Osylaısha otandastarymyz úshin Dúnıejúzilik oıyndarda djıý-djıtsýdan saıys aıaqtaldy.

10 tamyzda djıý-djıtsýdan faıtıng bólimi boıynsha 69 kelide Jánibek Ábý-Bákir chempıon atansa, 77 kelidegi Nursultan Dúısenqulov kúmis júlde jáne 62 kelide Aslan Qanatbek qola júldeni ıemdengen bolatyn.

Sondaı-aq el quramasynan karateden 50 kelidegi Móldir Jańbyrbaı kúmis júldege ıe bolǵan edi.

Otandastarymyz atalǵan jarysqa 1993 jyldan beri qatysyp keledi. Qazirge deıin olar 6 altyn, 4 kúmis, 7 qola júlde aldy.

Qazaqstandyq sportshylar 2022 jyly AQSh-tyń Alabama shtatynyń Bırmıngem qalasynda 1 altyn, 2 kúmis, 1 qola medalmen ázirge joǵary kórsetkishke qol jetkizdi.

Bıyl jarys 34 sport túrinen ótip, 253 medal jıyntyǵy sarapqa salynady. Aıtýly dodaǵa 17 tamyzǵa deıin 114 elden 4 000 sportshy qatyspaq.