Dúnıejúzilik oıyndar: Djıý-djıtsýdan qazaqstandyq eki sportshy chempıondyqqa talasady

ASTANA. KAZINFORM – Qytaıdyń Chendý qalasynda ótip jatqan XII Dúnıejúzilik oıyndarynda djıý-djıtsýdan qazaqstandyq eki sportshy chempıondyqqa talasady.

Búgin jartylaı fınalda Jánibek Ábý-Bákir (69 keli) ıtalııalyq Erasmo Paganodan 20:4 esebimen basym tússe, Nursultan Dúısenqulov (77 keli) frantsııalyq Persı Kýnsany 27:18 esebimen tize búktirdi.

Al Aslan Qanatbek (62 keli) jartylaı fınalda nıderlandtyq Ekko van der Vırge 13:27 esebimen ese jiberdi.

Fınaldyq jekpe-jekter 14:20-ǵa josparlanǵan.

Otandastarymyz atalǵan jarysqa 1993 jyldan beri qatysyp keledi. Qazirge deıin olar 6 altyn, 4 kúmis, 7 qola júlde aldy. Qazaqstandyq sportshylar 2022 jyly AQSh-tyń Alabama shtatynyń Bırmıngem qalasynda 1 altyn, 2 kúmis, 1 qola medalmen ázirge joǵary kórsetkishke qol jetkizdi.

Bıyl jarys 34 sport túrinen ótip, 253 medal jıyntyǵy sarapqa salynady. Aıtýly dodaǵa 17 tamyzǵa deıin 114 elden 4 000 sportshy qatyspaq.

Eske salsaq, budan buryn Dúnıejúzilik oıyndarda karate-do sportynan Móldir Jańbyrbaı (50 keli) kúmis júldege ıe boldy.