Dúnıejúzilik muhıt temperatýrasy baqylaý tarıhyndaǵy rekordty jańartty
ASTANA. KAZINFORM – 22 tamyzda Dúnıejúzilik muhıt betiniń ortasha temperatýrasy Tselsıı boıynsha 21,1 gradýsqa jetti. Bul – 1979 jyly spýtnıktik baqylaý bastalǵaly tirkelgen eń joǵary kórsetkish, dep habarlaıdy TASS.
Bul týraly Jerdi qashyqtan zondtaý jáne kartografııalaý jónindegi Copernicus qyzmeti málimdedi.
– Dúnıejúzilik muhıt betiniń ortasha temperatýrasy baqylaý tarıhyndaǵy eń joǵary deńgeıge jetip, 2024 jylǵy naýryzda ornatylǵan aldyńǵy rekordtan (21,09 gradýs) asty. Copernicus klımattyń ózgerýin baqylaý qyzmeti 22 tamyzda tirkelgen 21,1 gradýstyq rekordty rastady, – delingen habarlamada.
Copernicus mamandary bul kórsetkish muhıttyń ortasha temperatýrasynyń uzaqmerzimdi ósý úrdisine sáıkes keletinin atap ótti. Sondaı-aq ol Tynyq muhıtynda baıqalyp otyrǵan El-Nıno qubylysymen baılanysty.
Klımatologtar rekordtyń tirkelgen ýaqytyna da nazar aýdardy. Ádette Dúnıejúzilik muhıttaǵy eń joǵary temperatýra Ońtústik jarty sharda jaz aıaqtalǵannan keıin, naýryz-sáýir aılarynda baıqalady. Al bıyl teńiz sýynyń temperatýrasy kún saıyn derlik jańa rekord ornatyp keledi. Mamandar muny búkil Dúnıejúzilik muhıtta jylýdyń turaqty saqtalyp otyrǵanynyń belgisi dep baǵalady.
– Bul rekord Dúnıejúzilik muhıtqa túsetin qysymnyń artyp kele jatqanyn kórsetetin taǵy bir belgi. El-Nıno júıege qosymsha jylý ákeledi, alaıda bul adam áreketinen týyndaǵan jahandyq jylynýmen qatar júrip jatyr. Muhıt temperatýrasy kóterilgen saıyn teńiz ekojúıeleri men jaǵalaýdaǵy eldi mekenderge tónetin qaýip te arta beredi, – dedi Eýropanyń orta merzimdi aýa raıyn boljaý ortalyǵynyń (ECMWF) strategııalyq josparlaý jónindegi dırektory Samanta Berdjess.
Eske sala ketsek, qazirgi El-Nıno adamzat tarıhyndaǵy eń kúshti qubylystardyń birine aınalýy múmkin.
Sondaı-aq BUU El-Nıno saldarynan taǵy 49 mln adam azyq-túlik tapshylyǵyna ushyraýy múmkin ekenin málimdedi.
