Dúnıejúzilik mı isigine qarsy kúres kúni: Qazaqstanda mı isigin tiliksiz emdeý ádisteri damyp keledi

Dárigerdiń aıtýynsha, mı isigi tek bas mıynda paıda bolatyn dert emes. Ol adam aǵzasyndaǵy tinderdiń genetıkalyq ózgeriske ushyraýynan qalyptasatyn isikterdiń bir túri. Mamandar olardy qaterli jáne qatersiz dep bóledi. Sonyń ishinde menıngıoma sekildi qatersiz isikter jıi kezdesedi.

– Mı isiginiń paıda bolýyna áser etetin naqty bir faktor joq. Ǵylymı derekterde genetıkalyq ózgerister, tuqym qýalaıtyn sındromdar men basqa da qaýip faktorlary kórsetiledi. Alaıda bul otbasy músheleriniń bárinde mindetti túrde kezdesedi degen sóz emes. Tek aýrýdyń damý qaýpi joǵary bolýy múmkin, – deıdi Islambek Musabekov.

Dárigerdiń sózinshe, búgingi tańda dıagnostıkanyń damýy mı isikterin erte kezeńde anyqtaýǵa múmkindik berip otyr. Kompıýterlik jáne magnıttik-rezonanstyq tomografııanyń qoljetimdiligi artyp, kóptegen naýqas aýrýdy bastapqy kezeńde anyqtaı alady.

Sonymen qatar neırohırýrgııada emdeý tásilderi de túbegeıli ózgergen. Buryn tek ashyq operatsııalar jasalsa, qazir tiliksiz nemese az ınvazıvti tehnologııalar keńinen qoldanyla bastady.

– Ortalyq Azııada tek Astanadaǵy Ulttyq neırohırýrgııa ortalyǵynda gamma-pyshaq tehnologııasy bar. Bul ádis arqyly bas súıegin ashpaı-aq isik jasýshalaryna sáýlelik áser etýge bolady. Sonymen birge tamyrishilik operatsııalar damyp keledi. Mundaı jaǵdaıda dárigerler qoldaǵy nemese bóksedegi qan tamyry arqyly mıdaǵy patologııalyq aımaqqa jetip, qajetti em júrgizedi, – deıdi dáriger.

Onyń aıtýynsha, qazirgi medıtsınanyń basty baǵyty – naýqastyń qalypty ómirine barynsha az áser etetin ádisterdi qoldaný. Osy maqsatta robottandyrylǵan júıeler, neıronavıgatsııa, neıromonıtorıng jáne oıaý kúıde jasalatyn operatsııalar engizilgen.

– Keıbir otalar kezinde naýqas uıyqtatylmaıdy. Mundaı kezde operatsııa bólmesinde neırohırýrgpen qatar nevropatolog, logoped jáne psıholog jumys isteıdi. Olar naýqastyń sóıleý, qozǵalys jáne basqa da mańyzdy fýnktsııalaryn baqylap otyrady. Bul qazirgi medıtsınanyń eń joǵary deńgeıdegi múmkindikteriniń biri, – deıdi Islambek Musabekov.

Neırohırýrg búginde ózi de mı isikterin emdeýdiń jańa tásilderi boıynsha ǵylymı zertteý júrgizip jatqanyn aıtty. Onyń biri – isikti qorektendiretin qan tamyrlaryn jabý arqyly onyń kólemin kishireıtýge baǵyttalǵan embolızatsııa ádisi.

Mamannyń sózinshe, bul baǵyttaǵy zertteýlerge AQSh, Japonııa, Germanııa, Italııa jáne Úndistan elderiniń neırohırýrgtary qatysyp jatyr. Al qazaqstandyq neırohırýrgııa mektebi búginde halyqaralyq standarttarǵa tolyq sáıkes keledi.

– Ulttyq neırohırýrgııa ortalyǵy ashylǵan kezden bastap elimizge álemniń jetekshi mamandary kelip, tájirıbesimen bólisti. Sonyń nátıjesinde qazir Qazaqstandaǵy neırohırýrgııalyq kómek álemdik deńgeıde kórsetilip jatyr dep senimdi túrde aıta alamyz, – deıdi ol.

Aıta keteıik, buǵan deıin, Densaýlyq saqtaý mınıstrligi elimizde jyl saıyn 36 myń neırohırýrgııalyq operatsııa jasalatynyn aıtqan edi.