Dúnıejúzilik kóshpendiler oıynynyń ashylý rásimine barlyq bılet satylyp ketti
ASTANA. KAZINFORM – 8 qyrkúıekte «Astana-Arena» stadıonynda ótetin Dúnıejúzilik kóshpendiler oıyndarynyń ashylý saltanatyna barlyq bılet satylyp ketti. Bul týraly kóshpendiler oıyndaryna daıyndyq jáne ótkizý dırektsııasy basshysynyń orynbasary Abylaı Qondybaev aıtyp berdi.
«Búgingi tańda barlyq sport túrlerine bıletter ashyq satylymda. Biraq oıyndardyń ashylý saltanatyna barlyq bılet satylyp ketti. Ázirge sporttyq sharalarǵa 10 myńnan astam bılet sattyq. Eń kóp qyzyǵýshylyq tanytqan sport túrleriniń arasynda jamby atý, dástúrli sadaq atý, kókpar, báıge bar», - dedi spıker «Qazanat» ıppodromynda ótken baspasóz máslıhatynda.
6 tamyz kúni Dúnıejúzilik kóshpendiler oıyndarynyń ashylý saltanaty men barlyq jarysyna bıletter satylymy bastalǵan bolatyn. Ashylý rásimine bıletter 15 000-50 000 teńge aralyǵynda satyldy.
Bul rette, jarystardyń ortasha bılet quny – 3 600 teńge. Máselen, qazaq kúresi, alysh jáne kórásh sportyna bıletter 2 500 teńgeden 7 500 teńge aralyǵynda eken. Jarystar Jaqsylyq Úshkempirov atyndaǵy jekpe-jek saraıynda ótedi. «Alaý» muzaıdynynda asyq atý, ordo, mas-restlıng, kúrásh, arqan tartý jáne ashyrtmaly aba gúreshi boıynsha kil myqtylar júldege talasady. Bılet quny 1 000-3 000 teńge aralyǵynda.
Azamattardyń jekelegen sanattary úshin ártúrli jeńildikter qarastyrylǵan. 50% jeńildik mektep oqýshylary (6 jastan 18 jasqa deıin) men zeınetkerler úshin qoljetimdi. 5 jasqa deıingi balalar (orynsyz) men I jáne II toptaǵy múgedekter bıletterdi tegin ala alady. Jeńildik bıletterin rastaıtyn qujatty kórsetkennen keıin offlaın kassalardan satyp alýǵa bolady.
Barlyq jarysqa bıletterdi resmı bılet operatorynyń www.zakazbiletov.kz saıtynan satyp alýǵa bolatynyn eske salamyz.
Aıta keteıik, 5-shi Dúnıejúzilik kóshpendiler oıyndary Astana qalasynda 8-13 qyrkúıek aralyǵynda ótedi. Onda sporttyń 21 túri boıynsha 97 medal jıyntyǵy sarapqa salynbaq.
Álemdik dodaǵa 89 elden 2800-ge jýyq qatysýshy keledi dep josparlanyp otyr. Sonymen birge, Astanaǵa 100 myńǵa jýyq týrıst kelýi múmkin. Dúnıejúzilik kóshpendiler oıynyna qazaq sportshylary barlyq 21 sport túrinen qatysady. Sonyń bárinen medal alýdy josparlanǵan.
