Dúnıejúzilik kóshpendiler oıynyna daıyndyq barysy talqylandy
Elordada Týrızm jáne sport mınıstri Ermek Marjyqpaevtyń tóraǵalyǵymen 5-shi Dúnıejúzilik kóshpendiler oıyndaryna daıyndyq barysy týraly keńes ótti, dep habarlaıdy Kazinform.
Atalǵan vedmostvanyń baspaóz qyzmeti málim etkendeı, alqaly jıynǵa Ulttyq sport qaýymdastyǵynyń, Ulttyq jáne at sport túrleri ortalyǵynyń, 5-shi Dúnıejúzilik kóshpendiler oıyndaryn ótkizý jónindegi dırektsııasy basshylyǵy jáne Ulttyq sport federatsııalarynyń prezıdentteri qatysyp, atqarylyp jatqan jumystary týraly baıandama jasady.
Jıynda sóz alǵan Ermek Marjyqpaev Memleket basshysy Qasym-Jomart Toqaevtyń Dúnıejúzilik kóshpendiler oıyndaryn ótkizý – elimiz úshin mańyzdy sporttyq is-shara ekenin erekshe atap ótkenin jetkizdi.
«Oıyndardyń bastalýyna bir jyldan az ýaqyt qaldy. Memleket basshysynyń tapsyrmasyna sáıkes, 5-shi Dúnıejúzilik kóshpendiler oıyndaryn joǵary deńgeıde uıymdastyrýmyz qajet. Búginge deıin qandaı sharalar atqaryldy, alda qandaı mindetter tur, sonymen qatar qandaı máseleler bar ekenin anyqtaýymyz qajet. Oıyndarǵa daıyndyq jaǵdaıyna keler bolsaq, ázirge is-sharalar jospar boıynsha júrgizilip jatyr. Ulttyq sport túrlerinen qurama komandalardyń daıyndyǵy joǵary deńgeıde ótýi kerek. Sonymen qatar sportshylarǵa sapaly jaǵdaı jasap, qarjy máseleleri tolyq sheshilýge tıis», - dedi mınıstr.
V Dúnıejúzilik kóshpendiler oıyndary aıasynda elimizge álemniń 100-den astam elinen delegatsııa keledi dep josparlanǵan. Oıynnyń biregeıligi – sporttyq, mádenı jáne ǵylymı baǵdarlamalardyń ushtasýynda. Baǵdarlamaǵa 20 jarystyq jáne 10 kórneki sport túri enip, 110 medal jıyntyǵy oınatylady. Jarys at sporty, ulttyq kúres, sadaq atý, qustarmen ań aýlaýdyń túrleri, dástúrli zııatkerlik oıyndar boıynsha ótedi.
Qazirgi ýaqytta dúbirli dodaǵa qatysatyn sportshylardyń tizimi, 2024 jylǵa arnalǵan sporttyq-buqaralyq is-sharalardyń biryńǵaı respýblıkalyq kúntizbesine kiretin sport túrleri boıynsha jarystardyń tizbesi bekitildi. Oıyndarǵa daıyndyq sheńberinde Ulttyq qurama komandalardyń sportshylary 2024 jylǵy qańtardan bastap 13 halyqaralyq, 39 jergilikti oqý-jattyǵý jıyndaryna jáne 17 respýblıkalyq jáne 23 halyqaralyq jarysqa qatysady.
Eske sala keteıik, 5-shi Dúnıejúzilik kóshpendiler oıyndary bıyl Astana tórinde 8-14 qyrkúıek aralyǵynda ótedi.
