Dúnıejúzilik kóshpendiler oıyndaryna 120-dan astam ózbekstandyq sportshy qatysady
TAShKENT. KAZINFORM – Elimizde ótetin V Dúnıejúzilik kóshpendiler oıyndaryna Ózbekstan atynan 120-dan astam sportshy qatysady. Bul týraly Ózbekstan etnosport qaýymdastyǵynyń bas hatshysy Orhan Kapadze málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
«Dúnıejúzilik kóshpendiler oıyndaryna Ózbekstan atynan 122-125 sportshy qatysady dep josparlap otyrmyz. Biz sporttyń 14 túrinen baq synaımyz. Ózbekstandyqtar «Teńge ilý» men «Aýdaryspaqqa» birinshi ret qatysady. Bul biz úshin jańa baǵyt bolyp otyr. Sportshylarymyz júldeli oralady degen úmittemiz», - dedi Orhan Kapadze Kazinform tilshisiniń saýalyna jaýap bere otyryp.
Ol atap ótkendeı, qazir daıyndyq jalǵasyp jatyr. Ár federatsııa jeke baǵdarlama quryp, saıys pen ózge de is-sharalar uıymdastyrý arqyly sportshylardy jattyqtyrýda.
«Bul - aýqymdy jarys. Sondyqtan tolyq ári tyńǵylyqty daıyndyqty qajet etedi. Qazaqstan Dúnıejúzilik kóshpendiler oıyndaryn joǵary deńgeıde uıymdastyrady dep senemiz. Bul eldiń iri sporttyq is-sharalardy ótkizýde tájirıbesi mol. Etnosport, onyń ishinde at baptaý, sadaq atý sııaqty mashyqtar qazaq halqynyń ajyramas bóligi», - dep túıindedi Orhan Kapadze.
Aıta keteıik, kóshpendiler oıynynyń baǵdarlamasyna 21 sport túri engen. Sonyń ishinde kúres, kókpar, arqan tartys sııaqty básekeler Ózbekstanda da keń taralǵan. Buǵan deıin Ortalyq Azııadaǵy eń kóne qalalardyń biri Shahrısabzda aýqymdy etnosport festıvali uıymdastyrylǵan edi. Sol sharada kórshimizdiń sportshylary úzdikterdiń qatarynan kóringen.
Eske salaıyq, 8-13 qyrkúıek aralyǵynda Qazaqstanda ótetin V Dúnıejúzilik kóshpendiler oıynyna 89 elden 2 myńnan astam sportshy qatyspaq.
