Dúnıejúzilik kóshpendiler oıyndarynyń volonterlik baǵdarlamasy tanystyryldy

ASTANA. KAZINFORM – Astananyń birqatar ýnıversıtetinde stýdentterge 5-shi Dúnıejúzilik kóshpendiler oıyndarynyń volonterlik baǵdarlamasy tanystyryldy.

Týrızm jáne sport mınıstrligi málim eketndeı, jıyndarda 5-shi Dúnıejúzilik kóshpendiler oıyndaryn daıyndaý jáne ótkizý jónindegi dırektsııa basshylyǵy volonterlerdiń osy oıyndarǵa úles qosýǵa múmkindigi baryn, eriktiler qyzmetiniń tájirıbe jınaýdaǵy mańyzyn jetkizdi. Sonymen qatar volonterlerge qoıylatyn talap, ereje, irikteý kezeńderi týraly málimet jan-jaqty túsindirildi.

«Jastardyń eriktiler jasaǵy – sporttyq jáne mádenı sharalardyń mańyzdy bóligi. Meımandy qarsy alý, olarǵa jol kórsetip, baǵyt silteý, sheteldikterge aýdarmashy bolý sııaqty kózge kórinbeıtin istiń bárinde volonter júredi. Bylaısha aıtqanda, erikti degenimiz ózara rııasyz kómek pen patrıotızmniń, qoǵamǵa jáne elge paıdaly adam bolýdyń jarqyn úlgisi. Derek úshin aıtsaq, EXPO-2017 kórmesine 7000-nan astam erikti qatysty. Qysqy Azııa oıyndarynda da jas órenderimiz volonter retinde belsendilik tanytty», - delingen mınıstrlik taratqan habarlamada.

5-shi Dúnıejúzilik kóshpendiler oıyndaryna volonter bolýǵa nıet bildirýshiler https://worldnomadgames.kz/ saıty arqyly «Erikti bol» bólimine kirip, saýalnamany toltyrýy kerek. Barlyq talaptan súrinbeı ótken úmitker suhbatqa shaqyrylady. Volonter jumysyna 18 jastan asqan úmitker tańdalady.

Esterińizge sala keteıik, osyǵan deıin Astana qalasynda uıymdastyrylatyn V Dúnıejúzilik kóshpendiler oıyndarynyń sporttyq saıystary resmı túrde bekitilgenin jazǵan bolatynbyz.

Dúnıejúzilik Kóshpendiler oıyndary – etnıkalyq, dástúrli sport túrleri boıynsha ótetin halyqaralyq jarys.

2014, 2016 jáne 2018 jyldary Qyrǵyzstannyń Sholpan Ata qalasynda ótse, 2022 jyly Túrkııanyń Iznık shaharynda tórtinshi Dúnıejúzilik oıyndar uıymdastyryldy.

Endi V Dúnıejúzilik kóshpendiler oıyny bıyl, ıaǵnı 2024 jyly 8-14 qyrkúıek aralyǵynda Astana qalasynda ótedi.