Dúnıejúzilik kóshpendiler oıyndarynda úzdik aspazdar baq synasady
ASTANA. KAZINFORM — Bıyl Qyrǵyzstanda ótetin VI Dúnıejúzilik kóshpendiler oıyndary aıasynda ekinshi ret «Álem kóshpendileriniń ashanasy» halyqaralyq aspazdyq baıqaýy uıymdastyrylady. Bul týraly «Bırınchı radıonyń» tikeleı efırinde baıqaý úılestirýshisi Eldııar Tentımıshev málimdedi, dep Kabar jazdy.
Onyń aıtýynsha, bul baıqaý alǵash ret 2018 jyly pılottyq joba retinde ótkizilgen.
Bıylǵy dodaǵa 15 elden aspazdar qatysady. Ár memleketten bir bas aspaz jáne onyń kómekshisi kelip, barlyǵy shamamen 30 maman ózara baq synaıdy.
Baıqaý 2–5 qyrkúıek aralyǵynda ótedi. Qatysýshylar kóshpendiler taǵamdaryn zamanaýı úlgide ázirlep, usynady. Taǵamdar tasqa qoıylǵan qazandarda daıyndalyp, keıin qazylar alqasyna qazirgi talapqa saı bezendirilip usynylady. Qazylar aspazdardyń sheberligin baǵalap, úzdikterdi anyqtaıdy.
Baıqaý erejesine sáıkes, qatysýshylar úsh túrli ulttyq taǵam ázirleıdi. Birinshi kúni – byjy, ekinshi kúni – qýyrdaq pisiredi. Al úshinshi kúni jartylaı fınalda «Qupııa jáshik» kezeńi ótedi. Bul kezeńde barlyq aspazǵa birdeı azyq-túlik salynǵan jáshik beriledi. Olar sol ónimderden óz qııalyna súıene otyryp kez kelgen taǵam daıyndaýy tıis.
Baıqaýǵa Kanada, Ulybrıtanııa, Moldova, Túrkııa, Saýd Arabııasy, Ázerbaıjan, Grýzııa, Qazaqstan, Ózbekstan, Tájikstan, Túrikmenstan, Mońǵolııa, Reseı jáne basqa da elderdiń bas aspazdary qatysady.
VI Dúnıejúzilik kóshpendiler oıyndary Qyrǵyzstanda 2026 jylǵy 31 tamyz ben 6 qyrkúıek aralyǵynda ótedi. Ashylý saltanaty eldiń Táýelsizdik kúnine oraı 31 tamyzda Bishkektegi «Bishkek Arena» stadıonynda uıymdastyrylady. Al negizgi sporttyq jáne mádenı is-sharalar Ystyqkól oblysynda ótedi. Bıylǵy oıyndarǵa álemniń 90-nan astam elinen 3 myńnan astam sportshy qatysady dep kútiledi.
Aıta keteıik, Qyrǵyzstan Respýblıkasy Mınıstrler Kabıneti tóraǵasynyń orynbasary Ulan Mamatkanov Oıyndardyń 31 tamyzda – Qyrǵyzstan Respýblıkasynyń Táýelsizdik kúninde ashylatynyn habarlady.
