Dúnıejúzilik kóshpendiler oıyndaryna Mońǵolııadan 135 sportshy men jattyqtyrýshy qatysady
ASTANA. KAZINFORM — Altynshy Dúnıejúzilik kóshpendiler oıyndary 31 tamyzda Qyrǵyzstannyń Bishkek jáne Sholpan-Ata qalalarynda ashylady, dep habarlaıdy Montsame.
Mońǵolııa quramasy jarysqa sporttyń 27 túrinen 135 sportshy men jattyqtyrýshyny attandyrady. Qazirgi ýaqytta ulttyq qurama jarysqa daıyndyq jumystaryn júrgizip jatyr.
20 tamyzda Mońǵolııanyń Mádenıet, sport, týrızm jáne jastar isi jónindegi mınıstri Jýkovyn Aldarjavhlan bastaǵan resmı tulǵalar sportshylarmen kezdesip, olarǵa ulttyq týdy tabystady. Ashylý saltanatynda Mońǵolııa quramasynyń týyn ulttyq kúres sheberi D. Anar ustap shyǵady.
Aıta keteıik, buǵan deıingi Dúnıejúzilik kóshpendiler oıyndarynda D. Anar 10 medal jeńip alǵan. Onyń úsheýi — altyn medal.
Bıylǵy oıyndardyń baǵdarlamasyna Mońǵolııanyń ulttyq kúresi de resmı túrde engizildi. Bul sport túri boıynsha jarystardy uıymdastyrýǵa Mońǵolııanyń Ulttyq kúres federatsııasynyń ókilderi men sport kommentatory S. Gantýar jaýap beredi.
Eki jylda bir ret ótetin oıyndardyń ashylý saltanaty Qyrǵyzstanda jańadan salynǵan, 55 myń kórermenge arnalǵan stadıonnyń ashylý rásimimen tuspa-tus keledi.
Jalpy, bıylǵy Dúnıejúzilik kóshpendiler oıyndaryna shamamen 4 myń sportshy qatysyp, sporttyń 43 túrinen baq synaıdy.
Osyǵan deıin VI Dúnıejúzilik kóshpendiler oıyndaryna 3 myńǵa jýyq sportshy qatysatyny habarlandy.
Sondaı-aq 2026 jylǵy Dúnıejúzilik kóshpendiler oıyndarynyń talısmany retinde ilbis tańdalǵany habarlanǵan edi. Oǵan Bataı degen esim berildi.
Qyrǵyzstannyń Dene shynyqtyrý jáne sport jónindegi memlekettik agenttiginiń málimetinshe, VI Dúnıejúzilik kóshpendiler oıyndarynda kók bóri men kókpar jarystary jeke-jeke sporttyq dıstsıplına retinde ótkiziledi.
Budan bólek, mamyr aıynda Bishkekte Oıyndardyń bastalýyna 100 kún qalǵanyn kórsetetin elektrondy keri sanaq taqtasy resmı túrde iske qosyldy.
