Dúnıejúzilik kóshpendiler oıyndaryna kelgen týrısterden el ekonomıkasyna qansha qarjy tústi
ASTANA. KAZINFORM - Qyrkúıek aıynda ótken is-sharalardyń nátıjesinde Qazaqstanǵa 2024 jylǵy 1-13 qyrkúıek aralyǵynda kelgen sheteldik týrıster sany 597 myńǵa jetti. Onyń 68 myńy elimizge Astana jáne Almaty halyqaralyq áýejaılary arqyly, qalǵandary avto jáne temirjol kóligimen kelgen.
QR Týrızm jáne sport mınıstrligi baspasóz qyzmetiniń habarlaýynsha, sheteldik týrıster sanynyń kóbeıýine yqpal etken negizgi faktorlar – Dúnıejúzilik kóshpendiler oıynynyń ótýi men tanymal ánshi Dımash Qudaıbergenniń kontserti. Atalmysh sharalarǵa 89 memlekettiń azamattary kelgen.
«Sheteldik qonaqtar negizinen Qytaı, Reseı, Úndistan jáne Germanııa syndy memleketterden keldi. Mysaly, Qytaıdan 8 myńnan astam, Úndistannan 6 myńnan astam, Germanııadan 4 myńnan astam týrıst kelgen. Álbette, bul derekter Qazaqstanǵa týrıstik baǵyt retinde qyzyǵýshylyqtyń artyp kele jatqanyn kórsetedi»,- dep atap ótti Týrızm jáne sport vıtse-mınıstri Erjan Erkinbaev.
Vıtse-mınıstrdiń sózinshe, týrısterdiń edáýir bóligi Germanııa, Ózbekstan, Túrkııa, Qyrǵyzstan, AQSh jáne Ońtústik Koreıadan keledi.
EQonaq júıesi Astanada 12,4 myńǵa jýyq sheteldik týrısti tirkedi. Olardyń turýǵa, kólikke, tamaqtanýǵa jáne oıyn-saýyqqa jumsaǵan jalpy shyǵyndary 15,5 mln AQSh dollaryn nemese 7,5 mlrd teńgeni quraǵan. Alys shetelden kelgen týrısterdiń ortasha shyǵyny 1500 dollardyń shamasynda. Demek, Dúnıejúzilik kóshpendiler oıyndaryna kelýshiler el ekonomıkasyna qosymsha 625 myń AQSh dollaryn qosqan.
Aıta ketý kerek, elordanyń tanymal týrıstik nysandaryna 7-13 qyrkúıek aralyǵynda kelýshiler sany artqan. Aıtalyq Qazaqstannyń Ulttyq mýzeıi 14 myńnan astam adamdy qabyldap, «Astana-Báıterek» monýmentine 15 myńǵa jýyq týrıst, al «Nur-Álem» pavılonyna 10 myńǵa jýyq adam kelgen.
Halyqaralyq deńgeıdegi mádenı-sporttyq is-shara bolyp tabylatyn Kóshpendilerdiń dúnıejúzilik oıyndary Qazaqstannyń týrıstik ımıdjin nyǵaıtý úshin eleýli úles qosty. Kóshpendiler oıynynyń uıymdastyrý komıtetiniń málimetinshe, Etnoaýyl men oıyndardyń ózin kórýge 250 myńnan astap adam kelgen.
