Dúnıejúzilik kóshpendiler oıyndaryna daıyndyq qalaı júrip jatyr

ASTANA. KAZINFORM – Astana qalasynyń ákimi Jeńis Qasymbek elordada ótetin kezekti Dúnıejúzilik kóshpendiler oıyndaryna oraı abattandyrý jáne kógaldandyrý jumystary týraly aıtty.

«Besinshi Dúnıejúzilik kóshpendiler oıyndaryna daıyndyq aıasynda kóktemde jarys ótetin oryndardy abattandyrý jáne kógaldandyrý jumystary júrgiziledi. Shildede daıyn bolady dep josparlap otyrmyz. Sondaı-aq, qoǵamdyq keńistikterdi, atap aıtqanda, «EKSPO» aýmaǵyndaǵy saıabaq, Qabanbaı batyr dańǵyly (Syǵanaq kóshesinen «Qazanat» ıppodromyna deıin) jáne D. Qonaev pen Dostyq kóshesin uzartýdy josparlap otyrmyz», - dedi Jeńis Qasymbek Úkimet otyrysynda. 

Qala ákiminiń aıtýynsha, Astana aýmaǵyn kógaldandyrýdyń tujyrymdamasy ázirlendi. Ol eki bólikten turady: qoǵamdyq keńistikterdi damytý jáne kógaldandyrý. 

Eske sala ketsek, V Dúnıejúzilik kóshpendiler oıyndary Qazaqstanda ótedi. 

Aıta keteıik, Astanada 8-14 qyrkúıek aralyǵynda ótetin Dúnıejúzilik kóshpendiler oıyndaryna 100-den asa eldiń sportshylary qatysady.