Dúnıejúzilik kóshpendiler oıyndaryna arnalǵan mereıtoılyq poshta markasy aınalymǵa shyqty
ASTANA. KAZINFORM – Dúnıejúzilik kóshpendiler oıyndaryn daıyndaý jáne ótkizý dırektsııasy jáne «Qazposhta» AQ basshylyǵy birlesip, dúbirli doda qarsańynda mereıtoılyq poshta markasyn jaryqqa shyǵardy.
Jańa poshta markasyn tanystyrý rásiminde 5-shi Dúnıejúzilik kóshpendiler oıyndaryn daıyndaý jáne ótkizý dırektsııasynyń basshysy Naıl Nurov bul oqıǵa kóshpendi halyqtardyń baı mádenı murasyn qurmetteıtin jáne baǵalaıtyn barlyq jandar úshin mańyzdy is-shara ekenin atap ótti.
«5-shi Dúnıejúzilik kóshpendiler oıyndary – bul tek sporttyq is-shara ǵana emes, bizdiń dástúrimizben, mádenı muramyzben biregeı baılanystyń quraly. Mereıtoılyq poshta markasyn shyǵarý – ótkenimizge degen maqtanyshtyń jáne ony bolashaq urpaqqa jetkizýge degen umtylysymyzdyń sımvoly. Bul bastama kóshpendi halyqtardyń mádenı dástúrlerin saqtaýǵa jáne damytýǵa óz úlesin qosady degen senimdemiz», - dedi Naıl Nurov.
Mereıtoılyq poshta markasy 500 danamen shyqqan. ıAǵnı, sanaýly. Búginnen bastap elimizdiń ár óńirindegi poshta bólimshelerinen markany paıdalanyp, el ishinde, alys shetelge sálemdeme, hat joldaýǵa múmkindik bar. Estelik retinde satyp alsańyz da bolady. Baǵasy – 500 teńge.
Aıtpaqshy, álem boıynsha hobbı retinde marka jınaý ekinshi orynda tur eken. Bul rette, «Qazposhta» AQ mamandary 10, 20 jyldan keıin Dúnıejúzilik kóshpendiler oıyndaryna arnalǵan mereıtoılyq poshta markasynyń quny aspandap ketetinin boljap otyr.
«Qazposhta» AQ Basqarma tóraıymy Ásel Janasova Dúnıejúzilik kóshpendiler oıyndary aıasynda mereıtoılyq poshta markasyn shyǵarý – mádenı muramyzǵa degen qurmet belgisi ǵana emes, kóshpendi halyqtardyń dástúrlerin saqtaý men nasıhattaýǵa qosqan eleýli úles ekenin atap ótti.
5-shi Dúnıejúzilik kóshpendiler oıyndaryna arnalǵan mereıtoılyq poshta markasy biregeı fılatelııalyq óner týyndysy bolyp tabylady. Markanyń avtory – Dúnıejúzilik kóshpendiler oıyndary dırektsııasynyń marketıng bóliminiń basshysy Serik Býksıkov. Markada ejelgi dástúrdiń saqtaýshysy «Búrkitshi» beınelengen. Ol tabandylyq pen adaldyqty beıneleıdi. Markanyń ortalyq elementi – kóshpendiler fılosofııasynda júzege asyrylǵan ómirdiń aınalymy men ýaqyt pen keńistiktiń birligin beıneleıtin gofrlengen sheńber ekenin atap ótken jón.
Esterińizge salsaq, 5-shi Dúnıejúzilik kóshpendiler oıyndary Astana qalasynda 8-13 qyrkúıek aralyǵynda ótedi. Álemdik dodaǵa 89 elden 2800-ge jýyq qatysýshy keledi dep josparlanyp otyr. Sporttyń 21 túri boıynsha 97 medalder jıyntyǵy sarapqa salynbaq.
