Dúnıejúzilik kóshpendiler oıyndary: Sportshylar atyn arnaıy bortpen ákele me
ASTANA. KAZINFORM – Dúnıejúzilik kóshpendiler oıyndarynda janýarlardyń qatysýymen ótetin sport túrleri bar ekeni belgili. Áýejaıdan dombyranyń ózin ótkizý muńǵa aınalǵan kezde shetel sportshylary dodaǵa qatysatyn janýarlaryn qalaı tasymaldaıdy?
Bul saýaldy uıymdastyrýshylarǵa qoıdyq. V Dúnıejúzilik kóshpendiler oıyndaryn daıyndaý jáne ótkizý dırektsııa basshysynyń orynbasary Muratbek Qypshaqbaevtyń aıtýynsha, sheteldik sportshylardy jarys ıesi retinde Qazaqstan atpen qamtamasyz etedi.
«Dırektsııa shetel sportshylaryna at úlestiredi. Tek kórshi Reseı, Ózbekstan jáne Qyrǵyzstan sportshylary óz attarymen keledi», - dedi ol.
ıAǵnı, kórshi eldiń sportshylary attaryn arnaıy kólikke salyp, el shekarasyn attamaq. Sheteldik sportshylar óz attarymen kelmegendikten júlde aýylynan alys qalady deýge kelmes. Olarǵa elimizdegi úzdik attar usynylmaq. Jalpy, batyrǵa oń-soly báribir demekshi, aýdaryspaq sııaqty sport túrlerinde attan góri sportshynyń daıyndyǵy mańyzdy ekeni anyq.
Áýe kompanııalaryna habarlasqanymyzda, barlyǵy janýarlardy tasymaldaýǵa arnalǵan erejeni usyndy.
Máselen, SCAT áýe kompanııasynyń baspasóz qyzmeti usynǵan málimetke súıensek, janýarlar men qustar tasymaldaýǵa áýe kompanııanyń kelisilgen kelisimi jáne halyqaralyq reıster úshin kelý nemese tranzıt arqyly ákelýge ruqsaty bolǵan jaǵdaıda ǵana qabyldanady.
«Qustardy tasymaldaý kezinde tor jaryq ótkizbeıtin materıalmen jabylýy tıis. Tasymaldy brondaý kezinde jolaýshy tasymaldanatyn janýardyń nemese qustyń túrin, sanyn jáne salmaǵyn habarlaýy kerek. Janýarlar tirkelgen júk retinde áýe kemesiniń oqshaýlanǵan júginde ǵana tasymaldanady. Janýarlardy júk bólikterinde tasymaldaý kezinde janýarlardyń salmaǵy tegin júk alyp júrý normasyna engizilmeıdi jáne konteınerdiń (tordyń) salmaǵyn eskere otyryp, arnaıy júk tarıfi boıynsha tólenedi. Júk retinde ushaqta janýarlardy tasymaldaý tólemi júk tarıfteri boıynsha júrgiziledi», - deıdi SCAT áýe kompanııasynyń baspasóz qyzmeti.
Júk retinde iri úı maly, jabaıy, tuıaqty janýarlar, aralar jáne balyq otyrǵyzý materıaldary tasymaldaýǵa qabyldanbaıdy eken. Janýarlardy tasymaldaý quny Qazaqstan boıynsha salmaǵyna qaraı 5000-25000 aralyǵynda ekenin atap ótken jón.
