Dúnıejúzilik kóshpendiler oıyndary: mádenı sharalarǵa BQO-dan 100-ge jýyq adam qatysady

ORAL. KAZINFORM — Astana qalasynda 8-14 qyrkúıek aralyǵynda ótetin V Dúnıejúzilik kóshpendiler oıyndarynyń mádenı sharalaryna Batys Qazaqstan oblysynan 100-ge jýyq adam qatysady. 

BQO mádenıet, tilderdi damytý jáne arhıv isi basqarmasynyń basshysy Qýanyshbek Muhanǵalıevtiń Kazinform tilshisine málim etkenindeı, elordadaǵy etnoaýyl aýmaǵynda óńirden úsh kıiz úı tigilip, oblys mýzeıleriniń kórmeleri jasaqtalady.

Qýanyshbek Janbolatulynyń sózine qaraǵanda, H.Bókeeva atyndaǵy qazaq drama teatrynyń ártisteri kórermen nazaryna ulttyq salt-dástúrden kórinister usynady.

«Etnoaýyl aýmaǵynda ornalasatyn sheberler aýylynda oblystan 10 qolóner sheberi óz jumystaryn kórsetedi. Sondaı-aq 11 qyrkúıek kúni 50-ge jýyq ónerpaz etnofolklorlyq janryndaǵy kontserttik baǵdarlamasyn qoıady. Qazirgi ýaqytta osy sharalarǵa ázirlik júrgizilýde», - dedi Q.Muhanǵalıev.

Basqarma basshysynyń aıtýynsha, aldaǵy ýaqytta Astana qalasynda Aq Jaıyq óńiriniń mádenıet kúnderi, kórnekti mádenıet jáne óner qaıratkerleriniń shyǵarmashylyq keshteri, teatrlardyń gastroldik saparlary, respýblıkalyq jáne halyqaralyq baıqaýlar men aıtys ótkizý kózdelip otyr.

«Sonymen qatar 2025 jyly ótetin Qadyr Myrza Álıdiń 90 jyldyǵy, oıshyl ǵulama Ǵumar Qarashtyń 150 jyldyǵy, kúıshi Dáýletkereı Shyǵaıulynyń 205 jyldyǵy, Uly Jeńistiń 80 jyldyǵy, dombyrashy Naýsha Myrzagereıulynyń 155 jyldyǵy, aqyn Juban Moldaǵalıevtyń 105 jyldyǵyna oraı merekelik is-sharalar josparlanýda», - dedi Q.Muhanǵalıev.

Eske sala keteıik, budan buryn BQO aýdandarynda jańadan tórt mádenıet úıi salynyp jatqanyn jazǵan bolatynbyz.