Dúnıejúzilik kóshpendiler oıyndary kezinde qazaq aýyly qurylady
ASTANA. KAZINFORM – Bıyl kúzde Astanada V dúnıejúzilik kóshpendiler oıyndary ótedi. Aıtýly sharaǵa 89 memleket qatysatynyn rastady. Bul týraly Týrızm jáne sport vıtse-mınıstri Serik Jarasbaev málim etti.
«Kóshpendiler oıyndaryna daıyndyq jumystary qarqyndy júrip jatyr. Oıyndar 21 sport túrinen ótedi, onyń ishinde ulttyq oıyndar da bar. Ol úshin 7 sport kesheninde daıyndyq júrip jatyr. Sol sııaqty «Qazanat» ıppodromy mańynda qazaq aýylyn quratyn bolamyz, ıaǵnı kıiz úıler tigiledi»,- dedi Serik Jarasbaev BAQ ókilderine suhbat bere turyp.
Sondaı-aq, dúnıejúzilik kóshpendiler oıyndary kezinde ulttyq ǵylymı konferentsııa ótkizý josparlanyp otyr.
«Qazirgi kúni 89 el kóshpendiler oıyndaryna qatysatyndyǵyn rastady jáne ony 100 memleketke deıin jetkizemiz degen senimdemiz. Delegatsııa, sportshylardy qosqanda 2500-den asa qonaq keledi dep kútip otyrmyz. Sheteldik meımandardy kútip alyp, ornalastyrý úshin elorda ákimdigimen birlesip 32 qonaq úıdi daıyndap jatyrmyz», - deıdi ol.
Aıta keteıik, búgin Astanada ShYU sammıtine kelgen meımandarǵa kóshpendiler oıyndaryna daıyndyq barysy tanystyryldy.
Sheteldik delegattar arasynda Germanııa, Úndistan, Ispanııa, Italııa, Ońtústik Koreıa, Lıvan, Malaızııa, Norvegııa, Serbııa jáne Chehııadan kelgen delegattar men jýrnalıster bar.
Eske sala keteıik, Dúnıejúzilik kóshpendiler oıyndarynyń Qazaqstanda ótetini byltyr qazanda belgili boldy.
Al bıyl naýryzda alǵashqy bılet satyldy.
Aıta keteıik, dúnıejúzilik kóshpendiler oıyndary UNESCO qoldaýymen ótedi.
