Qazaqstan quramasy kók bóriden Dúnıejúzilik kóshpendiler oıyndarynyń kúmis júldesin ıelendi
ASTANA. KAZINFORM — Fınalda qazaqstandyqtar týrnır qojaıyndary Qyrǵyzstan quramasyna 0:12 esebimen jol berdi, dep habarlaıdy Kazinform tilshisi.
Toptyq kezeńde Qazaqstan V tobynda Tájikstan jáne Majarstan quramalarymen birge óner kórsetti. Ulttyq qurama alǵashqy kezdesýinde Tájikstandy 16:3 esebimen senimdi jeńdi.
Vengrııa quramasymen sońǵy kezdesý ótkizilgen joq. Eýropalyq komandaǵa 0:3 esebimen tehnıkalyq jeńilis berildi. Qazaqstan topta birinshi oryn alyp, fınalǵa joldama aldy.
Cholpon-Atadaǵy «Kók bóri» alańynda ótken sheshýshi kezdesýde Qyrǵyzstan quramasy alǵashqy mınýttardan bastap basymdyqqa ıe boldy. Birinshi taım 4:0 esebimen alań ıeleriniń paıdasyna aıaqtaldy. Eki salymdy Nurjan Melısbek ýýlý, taǵy bir-bir salymdy Qyıaz Nııazov pen Baıtegın Ómúrbekov oryndady.
Ekinshi taımda qyrǵyz shabandozdary basymdyǵyn segiz upaıǵa deıin jetkizdi. Kezdesýdiń qorytyndy bóliginde alań ıeleri Qazaqstan quramasynyń taıqazanyn taǵy tórt ret dál kózdedi.
Qazaqstandyqtar birde-bir nátıjeli laqtyrý jasaı almady. Fınaldyń qorytyndy esebi – 12:0, Qyrǵyzstan quramasynyń paıdasyna.
Osylaısha, Qyrǵyzstan quramasy altyn medal, Qazaqstan kúmis júlde ıelendi. Qola júldeni Reseı quramasy jeńip aldy. Olar úshinshi oryn úshin ótken kezdesýde Tájikstandy 3:0 esebimen utty.
Qazaqstan quramasy kók bóriden Dúnıejúzilik kóshpendiler oıyndaryn qatarynan úshinshi ret kúmis medalmen aıaqtap otyr. 2022 jyly ulttyq qurama fınalda Qyrǵyzstanǵa 0:5 esebimen jol berse, 2024 jyly Astanada ótken oıyndarda sol qarsylasyna 4:10 esebimen jeńildi.
Eske sala keteıik, keshe Qazaqstan Dúnıejúzilik kóshpendiler oıyndarynda úsh medal jeńip aldy.
